借題發揮：巫斯義安國倫唔會眼定定 歡樂寶寶有高風格

港陌

　　接住落嚟有唔少騎師停賽，新加入嘅公司騎師timing 啱晒，才是第二次上陣嘅安國倫，起碼呢次唔只騎得兩件，手上有5駒。另外，成日傳會退下來，但年年都見到嘅巫斯義，呢期又開始客串，直到3月尾。

　　有睇過上個禮拜三賽事嘅馬友，亦可能對安國倫冇咩印象，不過，見佢騎「寶成智星」算有板有眼，至少做到最基本要求，快閘但唔係亂放，直路彎前識得人走佢又走，初次出賽仲要跑谷草，有咁嘅演繹及意識，其實及格有餘，至於去到最後，有冇成績交出，就要睇佢造化，像當年獅王初到貴境，一樣冇人吼，成日坐冷板，就知道空有好身手係唔夠，際遇才是成功嘅基石。

　　呢期安巫二人坐騎數目一樣，普遍坐騎嘅機會都差唔多，而喺阿Jack心目中，見得人嘅唔係冇，「歡樂寶寶」及「高風格」就係嘞，希望佢地攞到啲成績。

　　講番「歡樂寶寶」，上場柏寶處理上唔算好大問題，唯一要挑剔係直路塞到死晒咁滯，但咁都輸唔得遠，今次加長200米更啱；「高風格」初出身形圓到肌肉有啲鬆弛，惟初次跑泥地仍可放到尾，經過熱身即回到首本路程，成績應有望再進一步。

Jack