極品絲語：家橋 施回馬槍

魑魅魍魉

　　今次賽事，回師谷中進行，大家自然想到又會是方嘉柏天下，馬房今次出馬八匹，部分場合的調配頗有心思，值得留意。

有分頭更值博

　　「家橋」今季一出即勝，贏馬姿態予人大幅進步之感，但其後匆匆出擊，結果又是冇打叠好。當然，上賽形勢對這匹馬甚不利，全程走外叠蝕位，結果末段無以為繼。今次縮回1000米作賽，同場有星味十足的「文武維揚」，此駒隨時由熱變冷，不變身條件。當然，「文武維揚」的質素亦不容懷疑，但「家橋」並非冇力對撼，只要賠率上有差距，可博冷W再補連贏。另外，有班底的「皇仁神駒」及新勝馬「分享」也可作配。

　　此外，葉楚航谷戰成績亦一向出色，今戰此馬房的「神箭金剛」便甚有留意價值。這件綵衣支持葉楚航多年，但大致成績一般，這匹老馬已算表現較佳一員。以往此駒三戰五班賽，取得一冠一亞一第五，今次落班優勢明顯，強配柏寶更是擺明車馬。對手方面，「我跑得」路有專長；「八飛」四落五有優勢，而「華劍寶」跑法主動，俱要留意。

　　股市方面，上回推介的金風科技（2208），急升一輪雖有回吐，但仍能在19.8以上收市，走勢硬淨，若未走貨的話仍可放心持有。另一心水推介是聯想集團（992），雖然之前進軍海外市場反應一般影響股價，但於國內及其他新興市場的銷售理想，內需及零售股熱炒下，現價追得過。

珊翠絲