同心威駿 強配捧盃歸

猪拉多纳

贏馬機器韋達一向挑通眼眉，坐騎計過度過先揀，每朝馬上馬落，無非要挑選最有餐士者上陣殺敵。
       
同心威駿上賽後八課快跳由韋達一手主理，緊張程度爆晒燈。

得韋達親自主課必屬正貨，若然摸實唔放手，更肯定絕非凡品。今晚第五場角逐美國會所盃之「同心威駿」，上回轉呂廐初出配韋達跑第二，鞍上人一騎鍾情，復課後八次快試均不假手於人，重視程度非同小可，大大增添呂健威的捧盃信心。
       
賀賢
軍刀換人冇有怕

賀賢：「軍刀」今季大熟大勇，演出更趨穩定，與勝利之門已非常接近，奈何接連敗於「小橋流水」及「大進」等強敵，實在無話可說。幸拚後馬兒並沒疲態，反而更上力，今仗抽5檔不俗，由於王志偉停賽，首次找來鄭雨滇接手，騎者已對馬兒脾性有相當認識，可望一拍即合。
       
徐雨石
祥禎靚檔輕磅着數

徐雨石：「祥禎」跑谷草一千米路有專長，此程累積兩捷，扳上三班後開始遇阻力，惟觀上仗同程只負兩乘許，可見目前評分仍具爭勝能力。錦標當前，今場對手不易應付，猶幸抽得二檔好位，將是此駒最大優勢，於C跑道競逐，或有機會憑輕磅接近。
       
告達理
常山鳳寶弗過上仗

告達理：「常山鳳寶」今季初出跑谷中千二米，老實說當時狀態未足，旨在開氣，估不到表現依然對辦，排外檔仍順利切入，且愈放愈起勁，最後五十米才告力弱。復課後加強操練力度，埋門狀態必更勝上仗，縮回上季尾兩連捷的一千米，路程有信心保證，不難克服重磅爭入前列。
       
呂健威
近課快跳韋達包晒

呂健威：「同心威駿」剛戰轉倉初出走勢比預期強勁，最後敗於質素超班的「此時此刻」蹄下屈居亞軍，絕對是雖敗猶榮。小休一個月後復於同程上陣，埋門馬兒勇況續添，此番強手已去，已做好準備迎接來投後首場勝仗。美中不足是排8檔起步，於路窄彎急的C跑道角逐，為前置馬增添一點難度，寄望馬兒出閘迅速，並借助韋達靈活的走位功夫，盡可能佔據有利位置競跑。單論狀態此駒已具爭勝水準，有力捧盃歸。