洪禮賢講馬：好友緣檔佳對手削

港陌

　　今期賽事喺谷草Ａ欄上演，根據季內兩期相同賽道嘅模式，外檔唔係冇馬贏，後上嘅又唔係完全唔掂，但普遍有表現嘅馬都係守好位及前置（罕見係小何喺三叠，「聖河」亦贏到），就算唔計九月八日嗰期落住雨跑嘅尾場，其他嗰十幾場，貼欄守靚位係不二法，某程度上劣檔冇有怕，最緊要陣上點擺位，像「聖河」的處境係萬中無一。

　　承接前文，五班兩場一哩的水準並唔平衡，雖則前文「濰坊」排位後執了10檔，希望有態頂得住，同埋，巫斯義會生生性性咁處理。

　　至於另一場，排位後略喜歡「好友緣」，此馬季內兩場名次各走極端，撇開當時狀態係咪有別（初出一役又真係唔多夠水準），令到成績出現咁大差別，「外遊」係初出跑包尾嘅致命傷，但該役又唔能夠怪罪於杜利萊，要賴嘅就只好推諉在韋達身上，因那場韋達坐騎「中華寶寶」，出閘冇耐楔到靚位，頂咗「好友緣」出三四叠，之後隻馬就一路蝕位蝕到入直路彎。

　　上場「好友緣」早段攞到埋欄，演出已完全唔同，至少拉士有份衝吓，嚴格嚟講，係爆得唔勁，主因喺緊迫情況下唔暢順（直路側頭）。此駒已跑過兩場，論態係比前實淨，難得今場對手再比之前兩場「削」，此消彼長下，有埋1檔及跑法之助，贏埋唔奇。