賠率有路捉：快意早飛硬淨

魑魅魍魉

　　第四場四班1200米，12 匹參戰馬中有3駒初出，係龍係蟲要跑過先知，所以呢場好難揀馬。噚日早飛大熱門喺「競駿寶寶」，名牌馬房加名牌馬主，初出成熱門可以理解，但奇就奇在位置大熱門唔係「競駿寶寶」，亦唔係「熱錢」、「好辣椒」及「森淼獵鷹」三匹上仗入圍馬身上，居然落喺「快意」度。

　　「快意」位置20蚊大熱外，獨贏亦只得80蚊，明顯WP都有捧場客，但隻馬上鋪跑包尾，難明點解會有咁多飛？記得隻馬最近兩仗隔夜飛數已經好勁，今次亦唔例外，即管睇吓今日表現又如何。

　　第七場三班1200 米，有「錢照贏」同「甜將」在陣，其他馬賠率一定好冷落，不過蔡約翰初出馬「勁飛寶」早飛就異常硬淨，一度得50幾蚊W，跟「錢照贏」同「甜將」相差唔太遠，相信有一小撮人知道隻馬有高質，有資格跟上述兩駒一拼，所以一早落定墊底飛。

騎師王揀白德民

　　騎師王方面，柏寶頭幾場坐騎如「野馬」、「辣得喜」及「父子兵」都好惡，但後面場次麻麻哋；反而白德民尾幾場屯駐重兵，「包裝選擇」、「甜將」、「共創未來」及「讚惑」隻隻惡到出汁，更加值得捧場。

周仲