洪禮賢講馬：實業英雄進步大

魑魅魍魉

　　韋達停賽復出，今晚騎幾匹都係實力馬，其中拍住葉廐嗰3駒，隻隻有飛又夠實力。數到練馬師，葉文兩廐固然係主角，尤其係前者，已有好耐未有頭馬到手，今晚成手好嘢，應該輪到擔正。

重心場次　第4場　第四班（60-40分）1800米

　　「實業英雄」季內兩場得季殿，陣上表現與上季最大分別係口勁，上季經常留唔到，但今季賽事途中聽使，學識留力尾段爆。既然在田谷中程試好晒，終於肯試埋呢程，應該可以再展示更強實力。

　　「好運得福」完全解釋唔到上場之失，因賽前賽後觀感依然好，改戰未失Ｑ嘅谷草1800米，不宜過早睇淡呢匹弗馬。「福到財星」上場前已指出，目標非首仗，敗績不用理，開氣後轉程即有表現，好開唔會收手。

　　「天鷹」賽前備戰算完整，而上次係多年以來最重秤上名，計正今場工夫稍為肉緊，有權爆冷。「壽比南山」閘內忟緊就開閘，打亂晒上場發揮，其實計出賽時間表，應差不多到位，今轉谷草毫無根據（冇試過谷閘），但同廐兼同父「大東海」OK，起碼唔係冇譜，加上以佢均速性能，轉場會幫到。

　　「稻庭烏冬」加罩試泥閘唔脫節算本事。「私家路」跑此程就算磅輕，止於一位。

第1場　第五班（40-10分）1650米

　　「創出傳奇」試夠3個大閘，配合埋此廐手影，有理由相信佢會揭開今晚大搏殺序幕。「世世無敵」落五班由細路變大人，加上明明剛仗冇態也得殿軍，一經熱身應到位。「朝東之星」唔啱跑法及形勢欠佳，剛仗一樣贏到，加5分賺到笑。

　　「我跑得」與全盛時期嘅佢，狀況上有一段距離，尊重往績才拖。「真如寶」及「金滿城」備戰認真，但前駒未證明過能力，而後駒則季內初出，限於視作冷腳。

第2場　第四班（60-40分）1200米

　　好多馬唔夠水準，但有狀態那批又唔覺突出；「奇蹟」季內三仗，呢次喺態況及相隔日子方面，算係最稱心，計馬喺目前分數亦有着數。

　　「超晒班」慣性慢閘，慶幸性能已轉款，唔係一味得重口。「皆大歡喜」有缺課陰影，進度明顯慢下來，係跑卡士。「領航動力」有1000米唔跑，但又唔似讓路性質，對手唔多，勉強可揀。

　　「駟馬難追」及「大地王者」外檔難頂，因兩駒唔叻，論態唔錯，邊線機會。

第3場　第四班（60-40分）1000米

　　「分享」四班掹掹緊，純因狀態好，將評級提升，只要7檔唔係處境太曳，要入圍唔使過好多關。「東方駿馬」情況與前駒相近，2檔預咗有欄傍住，唔係冇谷草經驗，會搵佢做膽。

　　「星光活力」唔使理上場泥地大敗賽績，因向來泥親都係一步都冇，而落班優勢明顯，係博11檔會遇咩形勢。「帶利財子」3檔夾跑法。

　　「飛魚駿王」賽前兩大閘試得好，本身質素則普通，配腳之選。「西域雄心」跑得番前仗水準，足以在今場上名。

第5場　第四班（60-40分）1650米

　　「可愛人生」連場入Ｑ，賽績可靠，如果上場唔係因爭位影響衝刺時間，可能贏埋，總之搏完兩場仲係咁銳，膽材。「威力高」肯針對性在賽前撻細閘，而試來有前有後，練者決心擺到明。

　　「瀟灑財星」上周讓路予廐侶「中華寶寶」，隔1周到佢跑，有幸抽1檔，而賽前騎者好落心機去操，應有鬥志。「心路」唔覺上場係因發揮或意外左右了成績，唔通換番柏寶可以唔同晒 ！？「不老英雄」完全對剛賽發揮Ｏ咀，視作泥閘吧！拖埋今次。

第6場　第三班（80-60分）2200米

　　「旺國手」季內搏極未散，趁有態轉到更啱路程，唔會手軟。「頭盤」上場已講過，前仗跑得好肉酸，剛賽做啱即贏，好開之馬係擔心重磅。

　　「活力奔騰」此程應可勝任，但能力未必及得上前兩駒。「勝利福星」易受賽事形勢左右，但2200米好衝過1800米。「正歡騰」1仗比1仗失望。

第7場　第三班（80-60分）1000米

　　「大把在手」前仗放頭，上場守好位，跑法及路程已經摸得好透澈，唔擔心縮短200米會削弱能力，由於檔位較「文武維揚」靚，又較好分，搵佢行頭。後駒上場沿路二叠居中，唔算食到形勢，但以快時間贏馬，頭馬具跟進價值。

　　「皇仁神駒」三班本來唔怕，惟剛勝締速不算勁，加上此廐新勝馬季內再出未好過，限拖腳。「常山鳳寶」2檔希望賺到形勢。「龍得風雲」此程不及1200米。「勁勇士」因缺課拖慢了進度，爭Ｐ居多。

第8場　第三班（80-60分）1200米

　　「心中有勁」處理手法一如頭場廐侶，唔操好唔出賽，事實上，今季在準備上比去季初出更辣，睇嚟今戰抱期望。「蜚聲」田轉谷，級數可恃，現階段縮程也是理性安排。

　　「海王子」1檔加113磅，就算喺谷草短途，一樣好有殺傷力。「祥勝愛駒」漸漸跑起水準。「如願以償」初出跑谷草，部署奇怪，11檔唔係冇風險，明知佢有班都要睇處境。