洪禮賢講馬：皆大歡喜 開勝門

魑魅魍魉

　　今晚國際騎師錦標賽好睇就好睇嘞，好唔好賭呢！？以前成日爆，但近年睇番啲賽果，熱門馬反而幾掂，所以，個trend好似轉轉哋。而今屆部分場次，幾匹熱門條件亦得，睇落未必爆得咩出樣。

重心場次　第2場　第四班（60-40分）1200米

　　「皆大歡喜」上賽前曾經缺課，但落場跑又唔係影響好大，如果出彎後直路頭早啲望空，可能衝到入Ｐ。總之，復課唔使就住，預期開氣後能力會大幅提升。

　　「勝爵」暑後復出成隻唔同，出閘再唔慢，陣中又識投入賽事，已服水土，而外地績在短途屢次跑得好，跑短未必唔好。「中國好」上場叮噹返嚟輸少少，喺四班係有卡士，唔係搏攰咗，今場有贏面。

　　「芙蓉威龍」處理出賽時間上做得好，令狀態跌得冇咁快，如非11檔影響大，三甲機高。「超晒班」希望少負11磅會有很大幫助，若不，最多爭三至五名。「贏馬組合」大閘試得好，係擔心6檔會點處理，搶得出或守到好位，有權爆。

　　「彪形好漢」檔劣、「駿盈」冇班，只可視作三重彩腳。

第1場　第五班（40-15分）1650米

　　「九龍寶」落到五班仍未有起色，可能泥地性能唔好引致。今場返回谷草，算係最有根據路程，畀埋最後機會。「濰坊」狀態喼得耐，如11檔跑得好好哋，依然係爭勝要角。

　　「暖在心頭」剛仗跑番應有水準，反映之前累積跑頭漸見功效，估計今場會再叻啲。「德雲歡欣」及「富高盈」一對馬近況企穩，只係能力普通，以及檔位形勢欠佳。「勁飛飛」評分大利，有分頭更要吼住。

第3場　第四班（60-40分）1650米

　　「八飛」上番四班沒有優勢，但在騎師賽有韋達之助，點都跑高多少，加上，2檔預咗沿路賺腳程，唔難在三甲佔一席。「精算拍檔」落到四班惡到出汁，可惜跑得好與否，真係冇保證！

　　「勁擊」回到一哩，又會比1400米啱衝，尤其今場或多馬在早段搶，營造合適形勢。「十足十」備戰唔完整，大閘贏來牽強，惟省完一大輪，進度趕到七七八八，有得爭Ｐ。「瀟灑財星」唔係外檔，以佢狀態係必拖。「再來旺財」及「無敵福星」有能力卻反覆，三重彩配腳。

第4場　第四班（60-40分）1650米

　　「浪漫添馬」準到痺，5檔加埋阿滇，發揮也放心，整體條件比對手理想。「超力駒」分數減到過晒籠，一旦好番，四班隨時贏得。

　　「創新高」跑到腳痛，令上場一步都冇，復課有充裕時間重新準備，進度OK，2檔亦可配合其靈活跑法。「高歡」後上馬12檔也不怕。

　　「消費王」連場失望，未知是否「向下望」心意已決！？「搏得威」靚位，有權爭獎金名次。「不老英雄」大致上冇借口原諒，係睇埋今場換上高手有冇化學作用。

第5場　第三班（80-60分）1200米

　　「文武維揚」唔會剩係識贏1000米，此程可能更勁，問題係目前仍未教好過猛嘅脾性，B欄12檔有幾大影響，好難講！？「輕輕鬆鬆」反正收斂了跑中程都係唔得，返番短途試吓亦應該，1檔有利佢放，睇吓帶到去邊。

　　「活力至寶」剛仗跑落比預期失色，計能力則略超三班。「至尊飛飛」上賽跟好位有Ｐ，表現恰如其分，但今仗8檔有點尷尬。

　　「帝豪名駒」適應能力快，一落番此程可贏得咁易，除非忽然走樣，如果唔係，以佢上場姿態，仍有連捷本錢。「心中有勁」7檔令早段處境未必好，邊線馬。

第6場　第三班（80-60分）1650米

　　「雪山神駒」以目前態況，三班唔會冇得撼，呢類馬落入柏寶手上，預咗跑高啲。「好兄弟」冇咩賣點嘞，係路程好、內檔及配搭強，但重磅及搏得太密卻令機會打折。

　　「和諧大使」有點「無雙小子」的影子，近況有轉好迹象，同埋，突然打王牌及轉場地，唔係冇手影。「寶成智星」2檔易攞主動權，莫狄做啱留放，在今場冇咩馬走場合，或可偷雞。「耀目」慢熱馬差不多到位。

第7場　第三班（80-60分）1800米

　　「好旺財」會唔會升班即被扑濕，完全冇得預測，樂觀啲去諗，路程經驗、銳勢及韋達，3樣加埋或可克服班次壓力。「蓋世子牙」1800米長力如何？根據血統背景，九成冇問題，只係初跑未必即掂，如果即可適應，佢最有贏面。

　　「正歡騰」上場見識到換人後有幾大差別，呢次抽埋莫狄，至少喼到陣上威力！「超勁精神」如果早段無故太快，就算路程略長，佢都有爆上嚟嘅本事。

第8場　第二班（95-75分）1650米

　　「智友」近績太準，上場亦有睇住食之嫌，如果巫帥不是被11檔考起，跑高半班都唔驚。「大衛精神」加脷帶，希望改善到陣上唔聽使毛病。

　　「皇龍戰駒」田轉谷，對其均速跑法係好事。「步步快」此程會比田草中程易應付。「幸福紅椒」上場蝕位衝仍勁，有危險性。