楝悉先機：天賜福星谷戰醒

猪拉多纳

　　大戰過後，一節淡三墟，今期賽事戲碼普普通通，但作為馬迷，有時好實際，理得你係「卡通飛機」，定係洗衣機，總之有得中，跑完馬心情唔悲，開開心心入場，一袋係錢散場就得。而呢期睇過形勢，摩、葉兩廐有強兵，尤其後者，有機會繼上個禮拜三起孖後，再炮製一場好戲。

　　第一場第五班1650米。「喜相逢」唔係健壯型，馬重1000磅左右，點會場場跑得好，同時，佢嘅路程性能幾窄，長啲唔到，跑短又追唔切，一哩係最好選擇，所以，呢場隔一排至跑，仲肯重返谷草一哩，安排最好不過，只要今場出閘冇唔妥，有埋前仗那股追勁，不勝有位。

友情友義落班執靚位

　　第三場第五班1200米。「友情友義」實力所限，四班任佢努力去砌，都係冇三甲，但今場總算獲上天眷顧，落班首仗即刻畀個好位佢，唔使好似近仗，場場(9)至(12)檔，未跑已經咁冇晒癮。再者，今場用小將何澤堯減埋磅，更加好放，C欄(3)檔，唔難一放到尾。

　　第四場第四班1200米。「天賜福星」未跑第一回合之前，馬房班手足同阿棟講過，呢匹馬幾高質，但跑得兩場，自己心生疑慮，有冇過分高估咗！但跑完上場之後，終於證明到隻馬唔係劣等貨色，初次跑谷草，差啲一口氣帶到終點，難度其實唔係低，大有可能谷草性能出眾。今場(3)檔， 早段唔難帶出，畀佢攞到主動權，放得順，直路真係唔易反先佢。

點買法

　　今期唔好，好多場合都係爆冷格局， 買熱門的話， 真係要睇清楚先好落注。選擇第四場作全晚重心，Q 膽「天賜福星」拖（1） 、（2） 、(4) 、(8) ，有冷有熱。獨贏過關買2x3，搭第三場「友情友義」， 穩陣啲， 補多注孖寶，尾關跑第二， 都收番啲跌打茶！

陳華棟