楝悉先機：凱旋昇輝冇對手

港陌

　　2010年最後一次賽事，今日喺沙田馬場上演，再下一次賽事真係第年先見，如果上周四晚搵唔到火雞馬唔緊要，希望在今天，贏馬迎新年！阿棟謹祝大家新年進步，送歲賽贏到開巷。至於今期賽事形勢，部分場次冷味濃，唔好以為大多係熱門收場，奉勸今日如果賭熱門，都要識揀擇。

　　第五場第四班1400米草地。「漸信良駒」上季曾與「電訊巨星」及「尚感」構成連贏位，嗰兩匹頭馬唔係叻，但此駒只係以極短距離見負，證明佢在四班有出頭資格。今季初出在此程跑第四，表現已不俗，因前三名絕非易與之輩，佢臨尾可以愈迫愈近，再次證明自己實力。寄望跑完1場，狀態有進，已可及鋒而試。

曬冷王無敗理

　　第七場第一班2000米草地。「曬冷王」講得多，其實有啲無謂，點樣勁？叻成點？剩係近兩W已清楚睇到晒，有本事當季內3W「勁高手」冇到，話過就過，上到一班長途，只要唔係對住跑級際賽那批強手，根本仲係好惡，呢次多負3磅上陣，應無敗理。

　　第九場第二班1000米草地。「凱旋昇輝」初出走勢已經好有吸引力，之後兩場俱入P，顯示出不凡能力，單單喺前仗直路賽，面對「小橋流水」及「共創未來」，仍僅以頭位見負，當時若果唔係一度轉位衝刺，未必贏唔到。隔過1場1200米後，是次重返1000米，同場搵唔到有像「小橋流水」般級數對手，應該順利打開勝門。

點買法

　　今期買熱門要好小心處理，二三線騎師嘅熱門，可能比較可信。好似「漸信良駒」及「凱旋昇輝」，乘埋有肉食，呢條2 x 3獨贏阿棟買梗，希望送到份新年禮物畀自己！而重心Q，都係揀第三場，揸3膽，腳拖11、12、14，買三重彩，可以考慮埋2、9。


陳華棟　資深評馬人