借題發揮：超班實力難隱藏 明海光輝草地變身

港陌

　　正如阿Jack之前嗰期話齋，雖然Tony（告東尼）上周四晚係有攞生日禮物嘅鬥志，講到機會馬反不及方嘉柏，結果方廐交出1W2P，前者啱啱夜馬只得1P，唔係事後先講，縱有好鬥志，仲有埋賀壽概念又點！？

東廐上半場有料到

　　有時唔係話可以年年如是，賽馬呢家嘢，永遠冇保證。兼且，如果嗰期，唔理騎練都好，上陣馬實力係普普通通，任你識飛都冇用，冇馬贏就係冇馬贏！不過，此一時彼一時，呢期Tony上陣馬真係唔同講法，尤其上半場嗰幾匹馬，如「龍船快」、「大將雄心」、「神州八號」、「美的人生」等等，相信要贏馬補祝生日，一啲難度都冇。

　　另一個值得喺送歲賽賽重視嘅馬房，梗係大摩，派馬上陣有限數，4匹而已，第五、六場嗰對當然唔覺有咩機會，但「明海光輝」及「曬冷王」，要起孖又有何難！

　　「明海光輝」初出一役形勢唔好，幾乎贏得到，超班實力表露無遺，上場衰咩？明眼人一睇就知，講多無謂，咪當真係一如白德民所講，形勢使然，呢次轉草地，大家好落台，蟲變龍，到時唔使解釋咁多！

　　「曬冷王」連續兩W，銳不可當之馬是也，跑長200米只會更勁，阿Jack預計呢匹馬係今屆打吡主角之一，目前100分都未到，哪有壓力。好嘞，由於今期係2010年最後一期賽事，筆者在此敬祝讀者身體健康，贏足兩年！　

Jack