楝悉先機：天賜福星變得精采

猪拉多纳

　　消息傳來，今日元旦賽大摩馬房會大舉出擊，十一場賽事出10駒，其中尾兩場更雙龍出海，睇埋隔夜飛，亦好硬淨，熱門1隻接1隻，幾乎全線惹飛，已經有啲嘢。如果一個唔好彩，賽後先知係雷聲大雨點小就冇辦法，但睇成批兵馬嘅數量及實力，贏唔到兩W以上，都唔算及格！

　　第三場四班1200米。「天賜福星」上場唔知點解會輸，但手足話畀阿棟知，嗰晚有雨及天寒，對隻馬影響大，所以，剛敗視作偶然就算。今次肯轉場地，唔喺谷草等抽獎，大摩交差心態明顯；年輕馬加配件求變用意好（B1T1），只要唔抗拒，可令佢投入到賽事，要放返嚟唔難。

爪皇盛水75分冇壓力

　　第八場三班1200米。「爪皇盛水」開齋一役贏得好險，但唔代表質素係得咁多，只因馬偉昌當時在留放上幾乎錯晒，早段不停人馬角力，未入路之前，又扣唔住坐騎，令到發力時間過早，如果唔仔係由頭錯到尾，點會贏短頭咁少。阿棟早已認定此馬二班仍然有得跑，目前75分點會有壓力，希望14檔唔好令騎者發揮騰騰震，咁就有望再W。

　　第十一場一班1600米。馬房手足告知，「軍事攻略」級數好犀利，係大賽武器，贏唔贏到打吡未知，佢喺中長途能力，唔係一般一班馬可以同佢鍊。而上場直路受阻，最終可跑獲殿軍，牛刀小試是也。今次加程啱晒，以佢卡士，重磅亦夠贏。

資深評馬人　陳華棟