洪禮賢講馬：世界和平可以嗎？

魑魅魍魉

　　除咗每日睇報紙，筆者閱讀book嘅習慣已多年，跑緊馬嘅日子可能睇少啲，暑期則會ko至少幾本，種類方面唔係多，來來去去係幾個範疇，通常係關於身心、心理、做人哲理等等，就如多年前上過吓NLP嘅課程，嗰輪雙眼會不停掃射嗰類題材嘅book。

　　約莫五、六年前，睇過1位傳媒人一系列大作，學懂一樣嘢，呢個世界唔係「零和遊戲」，通俗啲嚟講，你瓜咗，我唔會搵埋你嗰份！之所以，待人接物、處理工作上，唔好作假、害人，或做出損人不利己嘅動作，係自己座右銘。

　　只可惜，事端往往無故出現，火頭唔係自己點起，偏偏會穿州過省、跨越唔同媒介殺埋嚟。對於死又唔想死，彈又彈唔起，70後嘅我，可以點樣做？忍囉！雖然自己未做到打不還手、罵不還口，輕狂歲月已經過晒，去解釋即係掩飾，愈描有時愈黑嘛！當時運高，睇唔到， 由他吧， 腦海內日日盤旋：「let itgo、get over it⋯」，自我催眠、扮鴕鳥、不聞不問，並非上策，但止痕止咳，偶爾起到治標功效。

同文替韋達抱不平

　　下年就係自己喺呢行廿年， 行內某些inside story，有時聽完一笑置之。之前同文朱仔有感外界抹黑韋達，寫段稿解吓圍，你可以話佢多事，又可以讚見義勇為。想起岳敦當年有匹馬叫「世界和平」， 在2011年，「河蟹」可以嗎？