賠率有路捉：童夢隔晚張揚冧莊

猪拉多纳

　　第二場四班1200米泥地，睇早飛，「童夢」票數之勁，始料未及，開飛至到點幾鐘， 已經賣到得兩倍，純粹睇賠率表面唔算多飛，但睇埋涉及金額，只係受注咗1 個鐘左右，已經有超過4皮野捧呢匹馬嘅場，當時好多場合，獨贏夾埋都係得呢個數，咁早落定飛，梗係啲風吹得勁。老實講，五升四班，完全冇阻力， 唔會啩，咁樣掟得大錘，即係話畀我地知，完全唔覺班次壓力係咩一回事，好有決心連捷。

　　第四場四班1600米草地，「中國好」第1次跑1600 米，田草未好過，冇飛好正常，偏偏昨日三點幾，突然由廿幾倍冷W，跌到得8倍半，咁「沙卟」落定墊底飛，唔通此程比1400米更啱發揮。

騎師王白德民鬥柏寶

　　第八場三班1650 米泥地，「善戰」今季跑6場，得1 場有位置，三班好下風，竟然佢位置捧到最熱，只得18蚊，真係想問一句，何德何能？但隔晚莫名其妙嘅票數，相信事出必有因，敲吓無不可。

　　至於騎師王形勢，韋達軟咗， 開飛有6 倍半，唔似係波，反而白德民及停賽期滿復出嘅柏寶，夠晒硬淨，大家都係4倍以下，睇佢哋今日坐騎，實有排鍊！

周仲