洪禮賢講馬：智多飛 大幅進步

魑魅魍魉

　　第九場三班1800米。唔計「智多飛」打鋼架嗰場，今季3場賽事冇W有P，3歲仔有本事一再克服到難度，推算四升三班唔會有太大阻力（近季霍廐升班馬首仗上名率逾2成）。事實上，初出跑1600米上名一役，還以為純粹係內欄慳慳埋埋返嚟。但前仗贏1800米，再到上場縮落1600米再W，一連兩場可拋甩對手，睇嚟本身進幅，比加分速度快多多聲。雖然，今場對手唔係易啃，由於有幾大讓磅距離，未必如想像中咁難應付，加上韋達向來在同程有保證（季內9戰得 4W2P），揀得呢匹馬，梗有把炮。

　　第十場二班1400米。「甜將」愈來愈內斂，再跑落去，可能要加程配合都唔定，但剛仗才增程，相信未遇挫折之前，未使行呢一步住。今仗三升二班，會唔會被打壓，未真正碰過，邊個敢擔保得定唔得，但個人經常掛喺口唇邊，好開唔好硬要set個上限。

　　上場「甜將」負重再遇「勁飛寶」，賽前係好有被反先可能性存在，但贏起上嚟依然勁。雖然「勁飛寶」放頭跑未必係最啱，但要知道頭兩段慢過標準時間成秒，大致上賺晒，所以，沿路二叠冇欄嘅「甜將」，唔算好有形勢之利，最後幾十米仲可以睇住嚟贏，表面上勝負在短距離，骨子裏又好似唔多係。總之，上班減輕11磅，排埋好位又易跑，唔難繼續有成績交出。