高清睇跑馬：好小子1400啱尺寸

猪拉多纳

　　「好小子」雖話係蔡約翰放棄之馬，畢竟試過三次上名，當中兩場更係跑四班賽，加上仍算質新當打，今季評分減至新低，演出反彈點唔奇。胡森接手後未算進取，轉倉後頭三個月僅跑一場，不過踏入2011年棄開縫眼罩改戴眼罩，表現變得神勇，打叠上名，睇出賽片斷，前仗田草1400米全程貼欄慳位，但入直路一度受阻，處身「算得妙」及「晨速」中間位置，亦因為不想被困而早了發力，致最後腳軟外閃，衝刺不及頭對手強勁。

　　到了上仗，「好小子」跑田草1600米， 即總場次340，沿途跟住五、六位走二叠，步速超慢提早發力無可厚非，但段速實在太慢，加上衝力短，結果再次以短距離飲恨跑第三，追勁短次次輸少少，吸取經驗再戰，初三回師1400米必有最好發揮，對手爾爾，值得追多一次。

有盈有利強敵盡去

　　「有盈有利」初出總場次125田草1400米，不敵「皇帝旨令」獲亞軍，對手有幾勁眾所周知，該役仲要負133頂磅，而「皇帝旨令」只負124 磅，前駒當然冇運行贏唔到，相對當時仲係三歲馬，負重磅入Q水準極高。再出殺上1600米又遇到「皇帝旨令」，未能補中更降「呢」第三，但睇番亞軍「人人興旺」，之後在二班一樣打叠上名，不敵於兩匹強手不足為辱，就算上仗又係做阿二，但頭馬「雄心威龍」再出再贏，亦係高水準賽事。今次扳上1800米，首仗即跑1400米，第二仗已跑到1600米，長力方面絕對不用擔心，實力雄厚之馬，跑出水準開齋在望。

Sam