洪禮賢講馬：威皇鷹 好旺寶 活力駿駒 勝利旋峰

魑魅魍魉

　　今日係大年初三，祝願讀者們「兔」氣揚眉，場場勝利，日日歡天喜地，喺馬場有本有利，恭喜恭喜！傳統上，大節日唔會點爆得出樣，希望今日都係一樣，跑多啲紅盤馬，熱就熱啲，最緊要人人有得中，開開心心玩吓嘛。揀騎師，今日主角唔係韋達，就係白德民啦啩！

重心場次：第9場　第三班（80-60分）1200米

　　「威皇鷹」休出贏到甩晒，直路騎者有冇開鞭係其次，睇佢鞍上係咁意搖吓搖吓先「恐怖」，冇真正用力推騎，仲可以彈甩晒，加12分濕碎到唔恨，只要唔係重磅唔得，可再W。

　　「好旺寶」11月中曾退出，好在之後兩個幾月做番足，如非進度影響大，受讓前駒12磅，唔係冇得揮。「活力駿駒」初出表現符合預期，加配件及加程，或有幫助。「歐洲動力」三班輕磅其實有得爭吓。「勝利旋峰」復出第二仗表現有驚喜，按理跑短200米會更好。

第1場　第四班（60-40分）1400米

　　「快意」休後復出第二仗，加程明智，總認為佢喺四班超級，希望今場多馬早段走，有利佢追。「夢想家」一再前快後快放入Q，尊重其賽績，要拖。

　　「雄心馬主」分數減到過籠，回到主項，或係郁手預告。「乘奔御風」剛仗輸「外遊」唔使理，加程則睇唔出會唔啱。「高歡」連拼有時未必喼到。「樂融融」上場塞到最後200米，之後又唔係騎咗好耐，輸唔遠算叻，突加程要小心。

第2場　第四班（60-40分）1400米

　　「財運」連戰後暴露了缺點（ 流於均速），唔加程好難贏，估計今場1檔而轉到1400米，可提升威力。「新三刀王」未改變對佢睇法，加罩一定追多場。

　　「大地王者」及「幸運勇士」，唔係排外檔，會有贏面。「浪漫添馬」12月中工夫放慢晒，或影響進度。「飛魚駿王」初跑此程，性能要博。「好精伶」回到此程則會比1600米理想。

第3場　第四班（60-40分）1200米

　　「大家勝利」加程改跑法贏埋，睇番締速唔錯，唔似係符碌，加5磅應未係大負擔。「好友星威」上場走得比較嫩水仍入Q，實力唔簡單。

　　「和牛」未夠，係跑質。「風雲武士」輸外檔，係咪又克服到要博。「萬人迷」長期追一段，但成日贏唔到。「消費王」季內已有兩W，論賽績佢最堅，正路腳。

第4場　第三班（80-60分）1400米

　　「傾力之城」上場賽後發現有咳，或因此影響了發揮，如攞得出前仗入Q嘅本事，唔怕呢批馬。「金鑽龍華」回到此程會比短途好得多。

　　「氣定神閒」及「黃金褭蹄」，輕磅好追，但要早段扯得快才受惠。「勝利就手」上場已有拖，惜入P懷疑全因內欄關係。「龍城動力」加程、好位及減磅，絕對係提升名次因素

第5場　第五班（40-20分）1400米

　　太多邊線馬可揀；「幸運來」、「風馳電掣」、「強駒」及「招積仔」，4駒俱有班利，此程又冇問題，上名完全係意料中事。

　　「嘻哈大少」要博個眼罩令佢衝得更貫注，如果唔係，又可能一如上場一樣輸近。「齊鼓掌」上場人與馬演繹得差，輸得難睇，唔使理會，轉人排中檔，易取生位，可能仲好。

第6場　第四班（60-40分）1600米

　　「新希望」上場用嚟行頭，全程內欄慳位係關鍵之一，但大幅加程唔係易，所以，勿睇小佢嘅能力。按理只加兩磅，續可交出成績。

　　大告一對馬「傑出君子」和「得力助手」，同樣係揀開之馬，又有近績支持，正路腳。「金剛驃」回一回，唞夠兼做番嘢，大閘又省過，應有意思郁心。「漸信良駒」一再負重累積耗力唔細，有點戒心。「幸運多多」上場賽後指出跑法唔啱，但唔擔保跑得啱就會叻好多。

第7場　第三班（80-60分）1800米

　　「有盈有利」步步尺七，長途比中程易搵食，預期多馬走，中置跑法嘅佢仲夾，外檔亦唔擔心影響大。

　　蔡廄兩駒「勁高手」及「印度光輝」，上場唔上名有晒藉口原諒（1 隻蝕位、1 隻被撞），再出仍可畀機會。「開心老友」守好位跑法在今場又會繼續賺。「較量」回頭睇番，1600米可能係極限。

第8場　一級賽（3歲及以上）1200米

　　「蓮華生輝」一代短途王，今日使命係衝擊18W，追平「精英大師」紀錄，仍然對住上場速度系列首關對手，應問題不大。

　　大摩「共創未來」、「點心」及「同一世界」，前駒喺國際賽輕輕鬆鬆有第四名，級數證明晒，叠埋心水跑今場，有晒誠意。「點心」上場幾鍾意，但呢場驚未必放得到尾。「同一世界」上賽前懷疑前仗太差之後，會唔會即有番走勢，結果真係冇，惟經1場調節，今場又可能返嚟。「綠色駿威」跑到第3仗，差唔多夠皮。

第10場　第一班（115-90分）1400米

　　「新力勁」匆出從來唔會影響水準，落番一班對手實力縮晒水，形勢正晒，重磅依然有贏面。「加州萬里」賽績太穩定，正路之選。「飛闖」1400米能力係咪一如1200米，其實冇保證。「歡樂繽紛」兩試大閘唔係sharp，只可講最近嗰次冇咁曳。「確叻迅」118磅跑一班賽，有埋內檔，唔好睇小。「高點」大閘自動波竄上，印象好深，仍然弗，可拖。

第11場　第二班（95-75分）1600米

　　「陽明深心」、「何方神聖」及「人人興旺」，俱為今場機會馬，論前景可能前駒會最好。路程性能暫時則以後兩駒有揸拿，總之，表現好與壞，要睇發揮及際遇。

　　「金碧亮馬」早指出，如跑番起狀態，二班冇有怕，而上場輸短頭亦眼冤！「大衛精神」長期保持，可爭三三四四。「正毅」前仗入Q，但上賽前已擔心會一招了，結果不幸言中，再出仍不敢看好。