洪禮賢講馬：數據可以兩邊睇

魑魅魍魉

　　日前做直播節目，同拍檔講開盃賽場合，由08年起，大摩派馬跑級際賽（同場出3駒），主帥白德民喺25場裏面，取得7W6P，上名率有5成，百分比唔錯，但有位拍檔答曰：「即係有50%冇佢份啦！」，此話一出，我地3個拍檔齊齊笑呵呵。事實上，呢句話並唔係逆向思維，而係一語道破至真。

　　其實有咁嘅睇法，完全正確。數據，永遠有正反兩面，如果剩係睇好嗰邊，往往會失去分析能力。查番今季大摩與白德民，季內携手捧走8隻盃，只得國泰航空馬會盃，係由柏寶建功，真係好少唔係主帥做主力，偏偏兔年頭兩項盃賽就冇佢份。

　　主席短途仲好啲，「共創未來」有番個P，賀年盃嘅「飛闖」，跑到連獎金都冇，最終贏馬係臨尾落飛着燈嘅「新力勁」。

　　講開「新力勁」， 自己唔只喺live 係咁講，之前做賽前特輯已經提出，「飛闖」由主帥騎，未必係代表咩一回事（自己賽前貼士冇揀），轉路程就係轉路程，仲要上季隻馬曾經跑過而撞板（當時賽後騎者指出路短好啲）。雖然今季大1歲，可能氣量此一時彼一時，說穿了，其實都係估估吓。

　　記得拍檔嘉豪有時會講，唔好判定1匹馬得定唔得，譬如A 駒初跑泥地，賽前冇試過泥閘，家族成員又冇隻跑過（或者跑過唔掂），但可能A 駒會係例外，試問邊個敢寫包單 ！所以，賽馬世界，立體化思考好重要，當然，有時對與錯，未必代表立場啱定唔啱，但側埋一邊就一定超錯。