高清睇跑馬：金瑞進步出頭

港陌

　　「鑽飾彩虹」上季五戰全部大敗，但今季首戰出爭谷戰1200米立即跑近。翌仗轉戰1400米大敗，文家良即不再心大心細，一心安排牠專攻谷草1200米，結果在總場次114即取得首次上名，僅以短頭位之微輸給頭馬「回鄉精神」。

鑽飾彩虹強項出擊

　　翌仗文家良安排「鑽飾彩虹」再戰同程，並替其加上開縫眼罩，終點前與三駒齊齊影相，最終順利開齋。睇番與此駒惡鬥的三駒，「天賜福星」同「卡加小子」之後已補中，「中國好」早前亦影相僅敗跑第二，可見這場勝仗屬高水準賽事。上仗總場次316，「鑽飾彩虹」改戴眼罩上陣，轉彎走三叠，相反頭馬「競駿寶寶」則沿途貼欄一步不蝕，最終以短頭位輸給後駒，可算雖敗猶榮。今次「鑽飾彩虹」繼續在強項出擊，跑出水準篤定補中。

　　另外，季內總場次335的谷草1800米，頭四名馬「十足十」、「金瑞」、「劍鋒」及「橫亨」，今戰都齊齊在第五場上陣。該役「劍鋒」全程慢放，尤其是第三及四段，更慢至25.09及25.72秒，步速有利之下放入三甲好正路，至於「十足十」則全程跟前守在包廂靚位，亦是佔有形勢之利。相反，「金瑞」同「橫亨」則是在劣勢下追入前列，難度極高。

　　其中又以「金瑞」更犀利，早段走四叠蝕位無數，之後減少蝕位亦要走三叠，仲要冇遮擋沿途望空，但入直路後仍可交出強勁衝刺，最終跑入亞軍，反映五歲馬確有進步，今戰續跑1800米可出頭。


Sam