借題發揮：韋達3T起風雲 福到財星益fans

猪拉多纳

　　唔知閣下發咗新年財未？阿Jack勉強贏咗粒糖，年初三信大摩，WP捧「傾力之城」，熱熱哋，算係新年有得中吓！不過當日摩廐雖有大攻勢，但「威皇鷹」及「共創未來」相繼跑P，「飛闖」位置也不保，肯定唔少馬迷中招，所以，有時主力、副車，邊話得埋，唔到最後賽果出嚟，都唔知咩葫蘆賣咩藥！

　　而講到當日，韋達嘅成績及格啦，唔算出色，尾場「陽明深心」跑到冇影，但賽後驗到氣管內有很多膿痰，好彩佢贏到啲賀年馬如「財運」及「新希望」，新正頭，總會有人買意頭馬，呢條二串三W，乘埋都搵到餐晏，應該有部分馬迷受惠。

　　繼初三巨額3T之後，呢期谷草夜賽仍然有唔錯吸引力，有多寶470萬，如果一注中到，成千粒。橫財夢，有時發吓無不可，古語有云：「人無橫財不富」，當撥多少少錢出嚟，買個希望，冇乜相干。而今期韋達喺三關之中，場場有馬跑，兼且坐騎實力唔錯，發達可能要靠佢！

　　佢嘅坐騎，順序係「龍得風雲」、「福到財星」及「多益善」，前兩匹好似冇咁好機會贏到，頭馬希望應該後駒高啲，但「龍得風雲」位好檔佳，新近喺此程跑得好，未必冇P。

　　「福到財星」1800米曾力撼鐵馬「好旺財」，四班唔會冇腥氣。而「多益善」更係今晚韋達最佳馬膽，馬快路合，一放絕塵，已經講晒！　

Jack