洪禮賢講馬：明駿之寶快樂無窮不老英雄

猪拉多纳

　　今夜谷戰在A欄上演，望落各場出馬陣容， 明顯冇C+3欄那種異常混亂局勢，唔係話賽果會冇得爆，起碼會有個譜，加上，喺A欄賽事，好多練馬師會派番批似樣啲嘅馬嚟跑，揀起馬上嚟，好多場合唔會出現隻隻都揀唔上手嘅情況。而馬房方面，呢晚方葉兩廐應有動作。

重心場次　第3場　第四班（60-40分）1650米

　　「明駿之寶」今季未試過打叠跑同一路程及場地，終於有此安排，如果睇番對上兩季往績，呢場會係落點；上場直路喺內欄塞到嘔，拉士100米至開始有位望空，衝咗幾步就到終點，明顯係際遇影響成就。呢次做夠嘢兼儲足體力再跑，有晒手影。

　　「快樂無窮」3歲仔大幅增程博人唔信，但由首仗至上場，睇到陣上有改善，並試好晒跑法，如果今場唔博定先，或會走寶。「心路」剛仗遇到極慢頭三段（超過1分18秒），就算喺對面直路尾已發力，一樣追唔切，跑到入第五名算及格，今轉人而形勢啱追，再跟。「不老英雄」特登儲夠嚟跑，可能交到季初上名水準。「愛蓮說」及「精算拍檔」要早段拖得慢才有機可乘。「電光勁力」上場被迫轉跑法，末段力弱勿介意，今場好位可能唔同晒。

第1場　第五班（40-10分）1000米

　　「創先機」陣上一向冇保證，臨場情況安穩係先決條件。而睇佢上場初跑此程，冇形勢之下仍有P，值得追。「時時有機」只要用啱跑法，五班隨時上到名。

　　「馬中神駒」近仗硬係有甩漏，唔係出閘唔好，就係途中穩定唔到，難有信心。「實在好」剛仗有驚喜，唯一係要博谷草能力。「合利高」有番內檔，或可變身。「勵盈」如呢場有得追，會啱佢爆一段。「你好我好」如不沿路自殺在外叠，有權殺晒。

第2場　第四班（60-40分）1200米

　　「亞洲橙王」最後試跑拍跳喺埋欄幾好勢，近況唔係冇，回到主項，大冷可博。「卡加小子」只嫌隔夜賠率過熱，計條件四正。

　　「田園名駒」排到中檔，發揮會比上場理想。「閃耀小子」加罩、換人及轉場，有晒「落台」藉口。「日月暉華」及「齊勝」乃邊線馬。「超晒班」和「鑽飾彩虹」受制於大外檔，要克服唔係易。

第4場　第三班（80-60分）1200米

　　「龍得風雲」分數幾近摸頂，唔係有韋達及內檔，其實未必會揀。「至尊飛飛」唔怕匆出，經上場調校到跑法，即重返最有根據路程，可信。

　　「再來風」係擔心向來冇打叠上名。「定做」不論朝早及陣上，現時已受控，只係質素唔高，要睇形勢。「團隊精神」好開而分數冇壓力，換人仲正。

　　「鼓浪天風」評分早已在有利水平。「幸運傳奇」升班但外檔，雙重打擊。「中國神農」睇部署似「向下望」。

第5場　第四班（60-40分）1800米

　　「橫亨」A欄會比C欄好追，有埋1檔，條件應係近仗之中最好。「十足十」有冇上場夢幻際遇係一半半，尊重新勝則可拖腳。「勁擊」此程會比一哩好得多。「福到財星」排中外檔未必守到好位。

　　「金瑞」唔係沿路三叠，上場應贏，只要未搏散，今場有權補中。「劍鋒」大致跑盡晒，除非慢放才有機。「馬主光輝」加罩及加程即走光，今場肯強配，意識正面。

第6場　第三班（80-60分）1000米

　　「多益善」初出跑谷草已展示極熟練性能，兼良好速度，唔係霎眼嬌嘅話，今次縮程有幫，可放到。「科研精英」內側有幾匹快馬，有冇本事好似上場畀佢切入，真係睇運數。

　　「江山如畫」內斂後交出唔同能力，回班也不怕。「威威財星」及「海之宏」無可避免要承受頂出外叠嘅極大風險。「常山鳳寶」分數漸到新高，有難處。「金紫荊」快馬之中，最好形勢可能係佢。「飛快威」有痰先至冇表現，總之，上賽前試閘加罩見好，未真正跑過仍有寄望。

第7場　第三班（80-60分）1650米

　　「傳奇快車」唔係早段太慢，以及自己犯大錯，以此際能力，要上名唔難。

　　「心歡笑」前仗係咁意喺田泥一哩後上輸近，兜兜轉轉改戰此程，排埋好位，或會掹到。「寶貝王子」加磅後在三班只值中級，三三四四居多。「福到多多」進度係咁多，睇吓末段追番幾多。「旅遊小子」今仗在出賽相隔日子，以及賽前準備方面，係近仗之中執得最理想1場。「福喜」冇內檔，驚又會「外遊」。「生生不息」步速要夠快才幫到。

第8場　第二班（100-80分）1200米

　　「錢照贏」前速太快，4檔唔曳，有權再放到。「文武維揚」受讓十幾磅，本身拉士又爆得，睇吓直路追唔追得到。

　　「樂意洋洋」落班對手唔同，而上場直路阻到亂晒步韻仍近，估計喺今場有得爭。「金獅名將」上場有揀，惟實力在二班唔會太叻，尤其目前進度未達十足，作配尚可。「勁勇士」亦係外檔影響。「開心動力」有卡士，惜狀態未返晒嚟。

　　「萬里駒」11檔，預咗沿途至少走二叠，有隱憂。

馬會賽馬節目主持　洪禮賢