借題發揮：盃賽大摩世界

魑魅魍魉

　　今日有兩項盃賽，女皇銀禧紀念盃與樂善堂盃，仲因為跑大賽，call咗莫狄及蘇銘倫嚟幫手。記得上次莫雅嚟到，出馬唔多，不過，喺當日最重要嘅金盃入 Q。所以，今次兩大高手嚟到，坐騎夾埋得3駒，唔係問題，總之，喺重要錦標佢哋有貨交就夠，總好過騎足咁多場，原來一場空，咁遠水路搭飛機嚟，唔係為跑馬嘛 ！ 爭盃目標大過天。

　　不過，有誠意還有誠意，兩大高手坐騎係「好爸爸」及「美猴王」，後駒初跑1400米，遇着一群極惡精英，真係跑到位置，已經當佢贏。至於前駒，過氣馬王功力唔係全失，卻與盛年好有距離，又睇睇縮減200米、加強配搭及戴眼罩，會好成點，如果一定要2揀1，唔使講，當然要「好爸爸」，講到尾，香港一哩三連冠賽績冇假。

　　有謂寧買當頭起，同場最有威勢，離唔開「締造美麗」及「天久」，前駒手執兩場G1，一哩錦標及董事盃，雖然今場跑1400米，卡士與跑法，應該都夠殺！。後駒失落打吡預賽，證明長力勉強唔到，返此程梗係好過長途，若果交出贏國慶盃嘅超強表現，邊有對手。

出3駒又玩心理戰

　　不過，上述兩駒勁就勁，要捧盃真係要問聲大摩，佢老人家整3件出嚟，又同馬迷玩心理戰。喺之前金盃及百周年紀念銀瓶，主帥騎嗰匹，有時係主力，但有時又唔係，唔知今場如何調兵，淨係知道「同一世界」、「新力勁」及「共創未來」各有千秋，睇落係呢5駒之爭。 

Jack