借題發揮：剛爆半冷精神爽 贏開有條璐 鄭雨滇持續反彈

港陌

　　華將鄭雨滇，之前久經守齋煎熬，原來佢由1月9日贏完「星運俊爵」之後，連跑十幾期都冇W到手，終於等到上期，有隻「天子駕六」幫吓手，爆半冷贏番場，如果唔係，足足兩個月口糠糠。

　　做得騎師，贏馬最實際，主要收入來源是也， 有時一個唔好彩，被罰停賽，手停口停，仲要抬幾皮嚟抵銷一兩日停賽期，直情係雙失。如今，佢由低谷上番嚟，點都有番信心，其實，阿滇唔係未試過有咁樣經歷，09年1月尾至5月，曾經低處未算低，當時喺1月尾贏完， 等到3月尾執番1W，及後又再食白果，直至5月才重見光明。所以，一旦畀佢打番開缺口，好戲會喺後頭，仲要呢期佢強陣，8場出馬滿額，一於追住買。

　　睇佢今晚坐騎，4駒來自葉廐，排得好檔佔大多數，「卡加精神」、「田園名駒」已經係啱路程而檔靚，話實嘞，跑谷草1200米，排到1、2檔， 已經係成功嘅第一步，加上，呢對馬有分在手，預算賠率又唔會熱到冇肉食，WP 捧場， 信心強！

　　另外，捉路要揀「悅璐孖寶」， 今季積極減分，由92分「質」到落80分， 期間久不久輸得接近，但一直好少跑贏馬路程1650米。呢場又落到三班，冇好似前仗報長途，肯縮回1650米，而阿滇又死手唔放，種種迹象嚟講，呢場應該係target。

Jack