洪禮賢講馬:加州財子 升勢未止

魑魅魍魉

　　第十場二班1000米。「加州財子」出3場贏晒，全部係直路賽，暫時未有1場會畀對手埋到身，取勝距離至少有個幾身位，3歲仔仲有幾大進步空間，仍然未摸到個底，因為佢落場跑仲係錯緊，出閘反應係冇之前咁遲鈍，但講唔上好敏銳。其次，閃出閃入嘅習性未改到，但可一再以晨操姿態贏馬，先至令人繼續有好大期望。

　　而上賽負131磅造出56.63秒，係今季接近30場直路賽第五快，計正升班負中磅，冇理由會畀人「恰」到，尤其今場對手好多唔係路程專家，同埋近績麻麻，更加容易食，四連捷機會大。

　　第十一場三班1600米。「新希望」之前喺四班兩W後，一上三班只得P，並唔係隻馬唔夠卡士，好大程度係當時韋達攞位失誤有關，先至直路追極都追唔切。上場再跑雖然仲係贏唔到（沿途攞位啱番晒），一來，佢個第二名已經拋甩後列馬至少4乘，二來，贏佢嘅「包裝選擇」，係今季1600米少數可造出1 分35秒之內嘅頭馬（暫時僅得10駒），真真正正雖敗猶榮。

　　由於今場唔少對手係分盡，又或是1600米往績冇睇頭，再唔係就能力有限，比較之下，上場對緊嗰批「包裝選擇」、「喜蓮智星」等，級數明顯叻啲，按理呢次形勢更有利，只要唔係隻馬搏攰咗，或陣上犯大錯，補中成數幾大。