楝悉先機：有盈有利內檔抵玩

港陌

　　今日賽事，撇開田草C欄模式係點，由於韋達及柏寶各有一大堆好馬在手，兩大巨頭演出如何，將會對賽果造成好大影響，尤其係前者，啲馬差唔多全線有飛，真係要保祐佢生生性性，如果唔係，跑出嚟啲馬，肯定冷到震！

　　第三場四班1000米。「鷹之團」第一次出賽有晒支持，捧到兩倍W，明顯係信心飛嚟，夠膽初出即搏，自視不低，最終輸半個身位畀「星運俊爵」，其實已經係幾好賽績，因為頭馬季內喺四班已累積兩W。雖然今次賽前，佢隔咗好耐冇跑，期間工夫亦停過，練者畀得佢出，斷唔會求求其，用埋柏寶操刀，擺明想收復上場之失。

精奇實力超班

　　第五場四班1600米。「精奇」上場跑1800米唔係咁啱性能，加上，轉咗用太過進取跑法，令到成績倒退。今次縮番落1600米，又在配件上花心思，初次佩戴面箍，睇嚟會喺發揮上有唔同，希望佢會用番留前鬥後跑法。至於隻馬嘅能力，之前可力克當銳嘅「夢想家」，必超四班，不妨追多一場。

　　第十一場三班1600米。「有盈有利」正宗步步尺七之流，冇特殊竄勁，你要佢喺直路同你爆一段，係完全冇可能，守好位跑法最啱佢。今仗表面上係韋達棄之，寧取同場「新希望」，諗深一層，兩駒跑法其實差唔多，實力亦唔會有好大差距，對手7檔，而佢排3檔，早段要爭取有利位置，「有盈有利」實係着數啲，加上賠率又較好分，點解唔博。

點買法

　　對於今日投X策略，買獨贏鍾意第五場「精奇」，隔夜3個開，唔算好好分，勝在穩健。而連贏重心場次放在尾場，認為呢場唔會點爆得出樣，應該係幾匹熱門馬天下。

資深評馬人　陳華棟