借題發揮：勁飛寶忠心 勇敢小子蓄銳 蔡廐馬海搶灘

港陌

　　今日田草跑夠11場，早啲開場，收場遲啲，對於夠皮唔夠癮嘅馬友嚟講，梗係好事，可以磨足11場，爽！而今日有兩項盃賽上演，分別係第九場主席錦標，及第十場新加坡賽馬公會錦標，一睇盃王大摩出馬陣容，有晒爭盃feel，總共5駒爭兩盃，如果只為湊熱鬧，使鬼咁勞師動眾！？

　　把注意力放喺主席錦標，因為跑二級賽，總獎金3球，差唔多係第十場盃賽獎金嘅3倍，眾練者點會唔「起痰」。而上屆係大摩以「步步穩」封王，梗係想蟬聯，難怪佢派出3件精品，「爆冷」、「魔法幻影」及「共創未來」，成功衛冕機會唔係冇，剩係跑隻「魔法幻影」，可能已有一半以上對手及唔上，睇落大摩牌面都幾好。

　　但蔡約翰又好似想揩油水，參與度比大摩更勁，出夠4駒，主力、副車及花瓶角色誰屬，未跑前幾難分到真身，總之，佢就唔係冇心爭盃，又睇吓佢繼08及09年後，能否重奪此項盃賽。

　　而佢4駒之中，「好日子」及「勝眼光」老老哋，1600米嘅往績亦係陳年往事，不宜留戀。反而，「勁飛寶」和「勇敢小子」情況唔同，前駒太厲害，忠心程度直達馬王級，後駒則今季出得少，贏咗體力，如果一對馬返嚟，其實唔係奇，一於鴛鴦Q捧吓。

Jack