楝悉先機：步步快瞄準1200米

港陌

　　根據最近3期A欄賽果所見，再之前兩期嘅檔位冇咁大偏差，係到上期先至咁懸殊，8場之中，7場W由1至4檔馬包辦，係咪季尾因素唔敢講，但如果今晚較早場次有相同情況，就要醒水嘞！

　　第一場四班1000米。「精靈勇駿」今季表現大失所望，苦戰至今，贏唔到已經係奇，連1場位置都攞唔到，更加係世界奇聞。阿棟唔係講得誇張，上季佢曾經贏過「高飛飛」和「好快活」，兩駒喺唞暑前全部有馬贏，而該役「錢照贏」都有份跑，今季叻成點，大家有眼見，所以點會想到評分冇得上，仲會係咁落。既然近兩仗見番佢應有速度，今仗又肯縮程及轉場，成冷博一博。

　　第五場四班1200米。「皇仁勁駒」上場贏得僅僅熟，加咗分加咗磅，未必有兩劑，不過，從另一角度去睇，剛賽打低嘅馬唔係冇料到，此乃「鑽飾彩虹」及「閃耀小子」，兩駒均為近期有同程佳績支持嘅馬，最終都追佢唔到，頭馬水準有晒保證。由於加磅唔算好多，再者，今場對手又唔見得惡過上場，如果跑得出應有能力，穩位望贏。

　　第七場三班1200米。「步步快」之前喺谷草一哩，跑極成績都係一般（最叻第二），大摩縮番條槓，嘗試轉番短途，未嘗唔係好事。其實上季差唔多咁上下日子，佢仲喺二班同程入P，輸唔到兩個馬位畀「美猴王」，唔係冇實力㗎。既然啱啱有過1場1000米重新調校，今仗跑長200米，或可變身！

點買法

　　今晚谷草戲碼唔算好吸引，通常A欄出賽馬都唔會咁嘅樣，但今期部分場合局勢太亂，不宜沾手。所以，呢期只介紹兩隻WP畀大家算嘞，「皇仁勁駒」及「步步快」，是但中到1隻，已封蝕本門。

陳華棟 資深評馬人