洪禮賢講馬：勝利駿駒 縮程更掂

猪拉多纳

　　第九場三班1400米。「勝利駿駒」已跑4場，田草中短途及谷草一哩都跑過，除咗其中1場因沿路被迫出三叠，輸到冇影之外，其餘場場喺拉士皆見湧得唔錯。而今次唔等1600米，寧願縮程1400米，能力會唔會因此而比上場大，唔排除有呢個可能。

　　事實上，剛賽白德民已經跑啱晒，前中段攞位冇得彈，入正直路喺中檔穿上嚟，但最後200幾米一拍住「較量」鬥爆，完全唔係嗰皮，頭馬讓緊佢7 磅，仲要負132磅，居然鬥都冇得鬥，係咪級數有咁大距離，我有啲保留。希望今次藉着跑短200米，能強化末段竄勁，以佢嘅質地，唔難追入一席。

　　第十場二班1600米。「卡達聖」上賽前預期留放上會比前仗略作調節，因加程及轉了場地，但勢估唔到會守二三位，我唔知道表現唔好同呢點有關，定係陣中甩口、擠壓嘅影響，總之有嘢可以「賴」。

　　佢喺外地試過用後追及守好位跑法交出成績，既然喺近兩仗試過晒唔同方式，按理今場跑番1600米，唔應該會沿用上場嗰套，希望回用前仗留後衝跑法或更迎合馬性。正如上賽前所講，前仗如果唔係直路中段要轉位再衝，嗰場嘅第二名唔會係「勁高手」，而佢只係輸半個身位畀「勁飛寶」，二班點會冇得贏，今場就算係馬房第二次序馬，仍會追多場。

馬會賽馬節目主持　洪禮賢