高清睇跑馬：添福駿驥穩出頭

魑魅魍魉

　　「添福駿驥」今季首兩仗分別跑泥及谷戰，部署唔似敗績毋須介意，但第三仗於總場次406跑田草1200米，初綁脷兼票數強勁下即殺入季軍，頭馬「星運俊爵」跑出時間唔快，但「添福駿驥」蹄下敗將如「好辣椒」、「大地王者」甚至輸得較遠的「綠衣郎」之後非勝即位，何況「添福駿驥」當時走三叠冇遮擋，可見難度極高。接戰於總場次451跑番谷戰，頭馬「御將軍」全程貼欄一步不蝕，「添福駿驥」形勢不及僅得第二；上仗於總場次497再做阿二，只是頭馬「紅山茶」大超班而已，今仗強手盡去，係時候出頭。

　　「御鋒」質素非等閒，只因太重口唔識留力，故一直未有表現；但一月中於總場次324田草1000米殺入亞軍，接戰轉爭谷草同程，憑一檔優勢得季軍，該戰既要負重磅，頭二馬「紅衣叻叻」同「火燎腚」之後均有馬贏，可見「御鋒」並不失禮。

　　「御鋒」再出於總場次388的直路賽改配何澤堯減磅得手，到428場再出卻因擦傷腳未能應戰，上仗復出再建一功，時間56秒48乃今季田草三班1000米的最快締速，續爭直路賽再捷可期。

Sam