第6場三重彩$238,242 近兩季最冷

港陌

日賽果暴冷暴熱，第六場隻1.9倍大熱門「和牛」跑梗頸四，前三名「聚好盈」13倍、「化工之昇」40倍、「動力網絡」99倍都係冷門，三重彩派$238,242，係近兩季最冷。
       
聚好盈終點前力壓對手僅勝。

一向熱愛賽馬嘅高長昌，呢個禮拜可以話旺得交關，佢囡囡高葦穎隻「聚有盈」先喺啱啱嗰次谷戰轉入柏廐即贏，尋日輪到高生隻愛駒「聚好盈」出戰四班千四米，結果喺馬偉昌胯下終點前殺低「化工之昇」，爆出13倍冷W，兩父女一個禮拜內拉頭馬，難怪高生笑到見牙唔見眼啦。
       
航哥靠聚好盈連贏四日

高生賽後講番話「聚好盈」呢隻馬好尺寸，好彩馬偉昌今場騎得好，卒之以一條頸殺低對手。至於葉楚航就靠「聚好盈」連贏四個賽馬日，一樣旺氣逼人，航哥話呢隻馬有唔少問題，馬口又急，花咗好多心機訓練，依家可以再贏多場，佢都好開心。