洪禮賢講馬：江山如畫 泥地唔差

魑魅魍魉

　　第六場三班1200米。「江山如畫」泥地經驗好有限，得1場咁大把，性能得唔得，未必已完全反映到。實在3仗前嗰場同程，睇過佢沿路走位，跑得唔係差，由於出閘慢半拍，早段焗住喺尾，已經唔係佢最佳跑法，仲要之後一直喺三四叠冇遮擋，但見佢喺馬林一啲都唔怕食沙，出彎嗰段開始（抄出大外叠衝好蝕），其實湧得唔錯，由此推算，至少唔會抗拒泥地。

　　另一方面，由於近仗一再黐到「延續美麗」實一實過終點，老戰友新近上番三班一樣贏得到，怕且「江山如畫」此際喺當打期，三班唔會冇得贏。今仗排2檔起步，希望唔會又慢閘，如果跑得到最啱佢嘅放頭跑法，一啖氣放返嚟，一啲都唔奇。

　　第七場三班1200米。一睇今場幾多馬將會擺喺前走，對於「一定快」要靠追，或會營造有利環境畀佢，加上排到2檔，如前中段有欄慳埋慳埋，有可能賺晒形勢．大大提高勝算。

　　睇番佢近3仗同程表現，場場都有得衝吓，喺內欄如是，就算好似上場咁，末段拉出大外檔踩油，依然爆到段勁。呢排佢嘅狀態喺穩定期，而今季又未贏，練者應該會充分利用呢段時期搏得就搏，鬥志方面唔會冇，用嚟做馬膽，點會唔稱職。

馬會賽馬節目主持　洪禮賢