借題發揮：東廐排陣堅想掟甩大摩 蔡明紹搭師父順風車

魑魅魍魉

　　仲有十幾廿次賽期，冠軍練馬師之爭仍有變數，排第三嘅方仔，亦唔係完全冇機會，至於頭二名，經過上期之後，要執一執位，告東尼暫以52場頭馬做一哥，多大摩1場咁大把，相信往後賽期，時不時會出現互換位置嘅鏡頭，不過，睇佢哋呢期上陣馬，東廐應可加把勁，力保領先地位，睇吓會拉闊二人頭馬距離幾多場。

　　雖然今日東廐出馬量，唔係好似方仔咁叠馬，後者出夠12駒，但東廐大部分馬係好好近績，淨係得1匹後備補出嘅「大將風範」近仗冇表現，其他正選如「勁闖駒」、「一定爆」、「威利旺旺」及「喜蓮智星」，全部喺對上一場唔係贏馬，就係入P，排啲咁堅嘅陣容出嚟，畀晒蔡明紹騎，一為神功，二為弟子，睇嚟告東尼亦有心幫徒弟仔爭取好成績。

勁闖駒一定爆勢銳

　　「勁闖駒」及「一定爆」一對短途馬，真係有少少唔好彩，都排咗中外檔，谷草B欄唔知會有幾蝕，不過，兩駒亦有共通點，馬夠快，速度可靠，同樣係搏出一股銳勢，如果畀佢哋放到頭，可能帶返嚟。而「威利旺旺」好意外到依家都未贏，貴為上屆打吡亞軍，級數實有，大長途底子喺外地賽績亦已證明晒，再過嚟谷草，此際有狀態支持，能力當比3仗前唔同晒，有機會出頭。

Jack