高清睇跑馬：勁力進步穩連捷

港陌

　　「中華寶寶」季初在五班贏馬之後，上到四班作賽一樣建功，足見質素不差，就算之後未有頭馬進帳，亦都連場跑近，證明有分在手。

　　上仗總場次533，「中華寶寶」首度增程至田草1800米，由於步速完全不同，毋須留到太後，早段跟在五、六位競逐，慳位貼欄本來形勢幾好，但因為步速偏慢，未能好似其他馬匹般，轉彎中段已在外叠踩油，失了先機。

中華寶寶收復失地

　　更慘是「中華寶寶」入到直路意外多多，先被「無雙小子」阻住衝刺，接住又有「俊威威」欄住去路，就算拉士二百米可望空，也不過在窄位衝刺，難得劣勢之下未有卻步，後上如箭殺入季軍，僅以頸位不敵頭馬「福陞」。今戰再爭同程，續由勞愛德操刀，有過上次經驗之後，應該會有更佳發揮，有力收復失地。

　　另外，「勁力」初出跑谷草1200米即有重飛，可惜沿途重口，結果三甲不入。拼後小休兩個月，於田草1400米再上陣，但重口毛病未見改善，有遮擋下仍跑來搶口，潘頓無奈走出四叠，多耗氣力之下仍殺入季軍，表現出色。

　　上仗總場次536，「勁力」再跑同程，排二檔起步後留守內欄，走來一點也不搶口，進步甚大，入直路後順勢移出外叠望空，豈料前面的「幸運勇士」力弱向外斜跑，而剛啱發力的「桂花飄香」又內閃，令到前無去路。之後此駒走出外檔再衝過，望空後遲遲才撻得着，最終仍能以勁勢贏馬，反映後勁非凡，今次吼準1400米再上陣，連捷冇難度。

Sam