馬主論戰

魑魅魍魉

新力飛有權變身

　　今日重頭戲女皇盃，由應屆打吡冠軍「雄心威龍」擺擂台，我睇好佢可以再下一城，另外第二場隻廐侶「金莊」強配韋達跑番草地賽，苗禮德應該可憑呢對馬起孖兼捧盃。其他心水，仲有頭場「紅珊瑚」，我鍾意佢體重上升番，跑得出季內贏馬水準，呢度冇對手。大摩今日亦屯重兵，第四場「新力飛」上場跑泥地輸咗，今次回師草地賽應有唔同演出，隨時變身。　

張敬山

高風格忠心準繩

　　上個賽日啲賽果相當正路，大熱門全部入晒三甲，不過跑馬向來變數多，今次一於向啲冷馬埋手。鍾意第五場「奔騰飛駒」之前已經一再追得好，上場全程走外叠都輸唔遠，擺明仲有分在手，小心殺個措手不及。另外推介尾場「高風格」，跨季14戰全部有獎金收，真係準到冇人有，上場仲贏得好輕鬆，今次轉嚟沙田跑必受忽視，若然畀佢放到返嚟就會好分。　

任達華

明海光輝q定掂

　　剛啱大摩憑「軍事攻略」贏冠軍一哩賽兼食三寶，攻勢完全唔講得笑，今日女皇盃大賽日，繼續吼實呢個馬房唔會有錯。推介第六場「明海光輝」，之前一W兩Q全部用放頭跑法取得，但上場跑泥地卻留後，輸咗唔使介意，今次回師草地排一檔起步，搶放就掂。另外鍾意尾場「六六精英」，上場贏到對手冇得跑，五歲馬依家先至大熟大勇，轉場都有勝望。　

寇鴻萍、梁廷鏘