洪禮賢講馬：金紫荊 唔會冇影

魑魅魍魉

　　第六場三班1000米。「金紫荊」谷草1000米好少跑到冇晒影，演出穩定性算ok。而今季潘頓與徐廐喺谷草合作上，雖然唔係有咩輝煌成績，細心睇番嗰批合作馬，其實好多都跑到入獎金名次（9駒入前四名，10駒見負），由此反映此對拍檔，有交收之時，合作馬點都唔係岩岩巉巉嗰類。

　　而睇番今季此駒在同程表現，跑入前四名次數遠比冇影為多，至於跑到冇影嗰兩場，都係排晒中外檔（8及12檔），證明佢喺三班點都有啲斤兩。表面上，今仗冇咗何澤堯嗰7磅，孭番132磅，隨時又打回原形，能力變番前仗咁上下，要知道，今賽前有番較多休戰期，估計對提高能力幾有幫助。如跑得番季中同程入P水準（總場次384），喺今場冇有怕。

　　第七場三班1650米。揀膽喺「漸信良駒」與「福喜」之間選擇，由於前駒排1檔，沿路會少啲意外發生，咬好位比較容易，亦有可能賺晒腳程，就算贏唔到，要求佢入三甲，成數會大啲。

　　其實，前仗輕勝「旺家多寶」，表現出非一般能力，因為贏馬前後都跑過谷草一哩，畀人嘅印象係三班P格，唔係好鬥得，冇乜殺着，末段純粹靠檻等等，只因前仗贏馬姿態，從而對佢印象或改觀。如果剔除前仗贏馬賽績，能力值只係班內中下級，所以，今場唔會建議買W，但做孖T馬膽應可勝任。

馬會賽馬節目主持　洪禮賢