高清睇跑馬：橫亨換人見真章

魑魅魍魉

　　「精密紡」季初一直得個近字，但到季中集中在谷草上陣即交出好成績，對上四戰更取得兩冠兩亞。睇番季內兩場頭馬，分別於谷草1650米及1800米取得，兩仗均只贏對手半個馬位，距離看似不遠，但實際兩戰鞍上人黎海榮均睇住對手來食。

精密紡四班惡

　　上仗總場次555，「精密紡」改配潘頓出戰谷草一哩，起步後守在前列三、四位，因第三段步速轉慢，騎者急不及待走出外叠發力，反而「駕寶」則全程貼欄慳位，最終以不足一身位輸給後駒得第二，可算雖敗猶榮。今戰「精密紡」再爭此程，仍居四班作賽必佔優勢，回配最佳拍檔黎海榮，可以放心追捧。

　　「橫亨」季內第二仗已在谷草一哩入位，反映評分已屆有利水平，但葉楚航太高估其氣量，之後兩仗接連安排牠跑1800米，結果如意算盤打唔響，兩戰都跑梗頸四。痛定思痛之後，大前仗「橫亨」跑番谷草1650米，卻遇上「駕世仔」同「精密紡」等強敵，能上名已算出色；前仗加眼罩上陣則跟跑而回，試配備性質居多。

　　上仗總場次564，「橫亨」再跑谷草一哩，在柏寶胯下採用留前鬥後策略，入直路後於內檔取位，卻被前面的「浪漫添馬」封住去路；到最後一百五十米，「橫亨」在「福到財星」與「浪漫添馬」之間的窄位競跑，受擠迫時勒避。雖然賽後柏寶提出抗議，但最終只維持原有名次得第四，今次「橫亨」捲土重來，改配韋達有望贏回一仗。

Sam