賠率有路捉：和諧大使落班夠信心

港陌

　　噚日晏晝啲飛數好正路，大熱門通常都係近績佳嘅馬，即使第五場落喺初出嘅「夢仙」身上，此駒亦兩試大閘全勝，既然係咁，就算買冷馬都係拖番熱門為妙。

　　至於最多怪飛嘅馬，莫過於第三場「和諧大使」，佢季內七戰只得一殿，該役就係最熱嗰次，得4.7倍，之後大家好似認定佢衰梗咁，飛數大幅回落，接戰已經有40倍，第三仗仲誇張，99倍﹗其後雖然有次得番17倍，但大致上都係99倍。今次一落四班配番柏寶，噚日下晝大部分時間6倍零成為次熱門，隻馬落四班真係咁堅？睇番賽績，話說佢今季初出跑第四嗰役，其實已經壓倒現評74分嘅「帝豪名駒」，三班都有兩腳，計落四班的確係賺晒，今次仲戴番眼罩呢個贏馬配備，一於捧佢。

韋達騎足一晚抵玩

　　騎師王方面，韋達2.65倍，柏寶2.85倍，再次彈甩其他對手，當中韋達騎足八場，多柏寶兩匹馬，賠率熨手都冇辦法，有買襯早。

周仲