洪禮賢講馬：危險英駿牛精財星正榮京城三寶 佳景良駒神州八號歡欣滿載新力多

魑魅魍魉

　　暫時排喺練馬師榜前幾名嘅馬房，呢期以東蔡兩廐最重兵力，而近期久唔久出現輪流威之局，好有可能呢期會輪到上述兩個馬房。

重心場次　第6場　第三班（80-60分）1200米草地

　　「洪福齊來」轉倉後重生，殺番上三班差啲再贏，當時唔係外叠，好大機會贏埋。今場畀番個3檔佢，幫助好大。

　　「禮尚往來」以剛賽直路咁劣勢，臨近終線尚可輕易反先之後補中的「明海光輝」，非一般四班頭馬，唔擔心升班會下風。「喜惑」欠缺內檔及輕磅優勢，P格居多。「正黃旗」唔係備戰岩岩巉巉，以佢級數，縮程亦有威脅。

　　「伽羅」轉倉後，對佢好有期望，路短已建議博定先。「飛快威」一日唔加程，成就止於三三四四。

第1場　第五班（40-0分）1650米泥地

　　「金威神童」1檔又夠快，畀佢放得順暢，唔易喺直路反先。「兵奇臨」好大可能沿路會咬住前駒，形勢亦佳。

　　「快馬當先」及「百威紀錄」，向來難出頭，但佢哋近績極穩定，在今場已是實力分子。「年年開心」腳傷影響有幾大，一日未跑都好難講，純計今季賽績，則屬今場一線馬。

第2場　第四班（60-40分）1600米草地

　　「危險英駿」上賽已跟進，直路衝落冇預期咁好，未必是狀態問題，可能係心態，目標或在今場，一於追多鋪。「牛精財星」兩仗前三班此程後上得第四，當時係被前三名拋甩，但落班應夠用。

　　「正榮」初出跑一哩，難度爆晒燈，放至直路中段至力弱算及格，有過1場熱身，希望今場韌度趨強。「京城三寶」處身今場馬少兼步速唔快場合，啱晒佢均速置前跑法。

第3場　第四班（60-40分）1400米草地

　　「桂花飄香」能與「勁力」鬥至最後幾步，喺四班唔會冇得贏。雖然佢喺陣上仍帶稚嫩，只要跑到上場嗰套，已夠入圍。「事事順意」剛敗可當唔啱泥地或外叠，而此程能力於之前兩場已見識過。

　　「般若」及「大將軍」，暫時仲係green，加程則會比短途好，邊線馬。「偉感」啱啱跑獲殿軍，感覺係死慳死抵返嚟。「多贏勁駒」好位、換人及加程，有晒意圖，千祈唔好因上場唔啱路程和「外遊」賽績嚇窒。

第4場　第四班（60-40分）1200米泥地

　　「哈哈妙」接連在同程上名，今仗預期形勢實配合，9歲馬如體力頂得住，有望出頭。「寶貝」賽前準備明顯唔似之前幾仗，衝着這場而來。

　　「上海先鋒」剛仗有貼，惟全程黐欄而最終只得第四略失望。「氣定神閒」分數堅筍，冇地利、路短、重磅也不介意。「聚豪精英」非最銳之時，2檔望有接近演出。「馬皇帝」長期唔贏，卻經常輸近，寄望轉配件幫到手。

第5場　第四班（60-40分）1200米草地

　　「快樂無窮」拉士實在太過爆得，銳開加5分冇有怕。「王者先鋒」近兩仗跑法唔連貫，有本事一再接近，擺明有分喺手。

　　「風度翩翩」跑咗3場，如果睇上場沿路走勢，距離成熟仲有好大段路（左片右片及過促），但本身有股蠻勁。「多利皇」耐冇跑，難期望十足（最近大閘末段唔韌），只宜作配。「歡欣星」及「旅遊大亨」有賠率，T、F可考慮。

第7場　三級賽（80分及以上）2400米草地

　　「火龍駒」女皇盃入P，已覺出色，降級至此場G3，重磅一樣夠爭。「一言為定」兩線有晒大長途支持，惟首次掹上2400米，未必交到十足能力。

　　「曬冷王」前仗打吡只得殿軍頗失望，卡士冇預期咁高，尚幸今場磅輕。「威利旺旺」此程比2200米啱，如果有幾滴雨，仲有威脅。

第8場　第三班（80-60分）1800米草地

　　「佳景良駒」上場第三，發揮唔收貨，彎位唔警覺太慢而早點發力，韋達要負責任，希望跑番1800米，佢會有唔同演繹。「歡欣滿載」除頭罩及跑短200米，如跑得好，即係胡森摑自己一巴，但前仗輕勝卻真係勁。

　　「神州八號」及「高友勁」，賺完慢鬥慢形勢又如何，今場可能仍是類似環境。「新力多」唔係擔心鬥慢，陣上唔受控，其實佢有機會出冷。

第9場　第二班（100-80分）1400米草地

　　「蓬萊仙子」少數喺同程跑得唔好，準字行頭，只要騎者發揮略有水準，有權放入三甲。「國寶」從來唔怕唞，而9戰未失P之馬，正路之選。

　　「奇葩」、「永勝多」和「高一線」1400米性能幾好，惟今場卻未必啱追。「貝利高」自領或守二位都得，如早段唔快，可食正形勢。「君河」試閘常有追勢，卻係要迫住迫住。

第10場　第三班（80-60分）1400米草地

　　「太陽海岸」冇咩好批評，雖然現時仍嫩水，起碼見上場有改善，估計上三班都夠。「芙蓉威龍」能狂追前駒，冇理由配腳唔預佢。

　　「魔幻大師」上場只得第四，賽後已覺之前高估了其進展。「中環英雄」三班冇得贏會好意外，睇法有冇偏差，轉馬房三兩場便知，當然，今場已開始要跟。

　　「威騰駒」及「龍城動力」，兩駒各有可取之處，冷腳。「馬風雲」除非多匹對手失準才有機會。

馬會賽馬節目主持　洪禮賢