賠率有路捉：大將軍外檔都有飛

魑魅魍魉

　　噚日開飛後大部分時間第一至四場嘅大熱WP唔係喺晒同一隻馬身上，即係話呢四場嘅重心馬可能唔太穩陣，馬迷投X時最好小心啲。

　　第三場四班1400米，「大將軍」啲飛數係至今最熱一次，呢隻馬來港後跑過三場，最後賠率最熨嗰次都有10倍，其餘一次26倍，一次63倍。老實講，佢賽績唔算差，起碼近兩仗獲一殿一第六，今次突然有飛唔奇，不過問題出喺個檔度，呢隻馬前三場排咗兩次一檔，一次四檔，賠率都冷過雪櫃，點解今次排喺十一檔隔晚有飛，一度得7.1倍呢？唔通因為韋達肯騎？可能真係都未定，事關韋達對上五匹田草十一檔馬都入前四名，有佢幫手已經秤高一級，加埋有飛，今次唔試等幾時？

蓋世子牙轉場破數據

　　第九場二班1400米，「蓋世子牙」跑盲門嘅田草得9.8倍，真係講都唔信。話說呢隻馬只喺谷草一哩贏馬，近兩仗玩長途玩泥地，飛數當然唔信，跑出嚟亦理所當然唔似樣。當大家以為佢返谷草一哩先會再熱時，今次竟然有隔夜飛，唔通真係破數據？不妨博一博。

　　騎師王方面，呢鋪開售時柏寶散晒熱有11倍，唔多似得，相反同韋達鬥熱嘅係蔡明紹，前者1.8倍，後者2.5倍，紹仔熱同佢師父爭緊冠軍練馬師有關，既然有飛，捧佢。

周仲