借題發揮：大把在手萬能駒拍拖更 徐雨石又泥密密食

魑魅魍魉

　　正如早前講過，田草賽期乃兩大馬房東摩必爭之地，就好似個禮拜六，東廐又起孖嘞！其他馬房要分一杯羹，的確唔容易，但有1個馬房，經常有本事可穿梭沙田及谷草，仲要密密食（最近7期得6W），冇話因為兩個場地，畀啲巨頭插晒旗而交唔出成績，佢就係徐雨石嘞！而最令人喜歡嘅地方，係佢旗下馬，熱又得，冷亦可，十幾蚊馬贏得，幾十倍一樣爆完又爆，所以，經常令捧場客有驚喜，吼冷門，唔買呢類馬房，肯定係自己損失。

　　由於今日有4場泥地賽，按照今季徐廐泥地成績，暫時贏馬最多，上名率也超過3成，而佢喺今日其中三場泥賽有派馬跑，阿Jack對於「大把在手」及「萬能駒」比較有信心，始終今季經常喺今仗路程跑得好，泥地性能一流。而咁啱兩駒之前1期贏馬，係約埋一齊喺23/3夜賽，石哥呢期又有咁嘅安排，唔係冇部署㗎！

　　另外，「幻想家」肯定喺第六場係冷門身分，但唔係冇機會爆，事關大長途通常早段及中段慢鬥慢，賽事環境好啱佢，加上，呢場嘅賽程田草2200米，幾年先跑1次，互無根據下，唔買放頭馬，唔係咁划算噃。

Jack