6隊衝線 基達菲最牙煙！

港陌

21/05/2011


西甲今晚煞科，雖然前4大局已定，不過護級形勢就亂到九彩，仲有6隊未肯定護級成功，其中1隊要陪艾美利亞同靴高斯降班，當中最大危機嘅肯定係基達菲，事關佢哋今晚嘅對手係要搶分上岸嘅皇蘇，基達菲一輸波就要望天打卦，隨時出事，今晚西甲大結局，真係好睇過戲！


皇蘇出必殺技爆「基」


今日《是日正菜》朱楓會炮製西班牙大雜燴，目前西甲仲有6隊要鬥埋煞科戰先知邊隊降班，當中皇家蘇斯達更會喺主場同基達菲直接交鋒。皇蘇為成功護級焗住出「必殺技」，將波飛大劈價，希望坐爆主場造勢，「作客蟲」基達菲今鋪有難，2.2倍主W抵玩！（now633台及廣東體育周日凌晨4:00直播）


基達菲作客唔識入波


賽前《馬卡報》形容今季西甲護級形勢係史上最激，皆因以往從未有球隊攞43分都要降班。事實上，家陣個形勢的確亂到爆，當中最重要一戰，肯定係皇家蘇斯達鬥基達菲。




波飛減到108蚊坐爆主場




目前皇蘇領先基達菲1分，今場和波就成功護級，不過皇蘇賽前宣布推出2,500張10歐元（約108港元）波飛谷爆主場，朱楓都覺得皇蘇呢招幾醒，事關皇蘇目前聯賽44分入面有34分係喺自己地頭攞番嚟，近3戰主場出擊全勝，當中包括打破巴塞作客不敗金身，加上佢哋有王牌中場皮亞圖（圓圖）傷愈復出，要延續佳績唔難。




對家基達菲早前獲杜拜財團收購，但呢班波好似冇乜改善，作客仲一樣曳到爆，踏入2011年至今竟然仲未開齋，而且近10場客戰先入得5球，點睇都唔似可以喺今晚嘅生死戰反彈囉！

是日推介

皇家蘇斯達

（主勝）2.2倍

薩拉戈薩

（客勝）1.65倍

拉科魯尼亞

（入球大）1.75倍

奧沙辛拿

（主勝）1.72倍

馬略卡

（入球大）1.62倍