護級5兄弟10億保衛戰

猪拉多纳

22/05/2011
文： 樂比堅尼

英超冠軍塵埃落定，今晚煞科焦點落喺護級戰上，五支護級隊布力般流浪、狼隊、伯明翰、黑池及韋根只能有三隊留喺英超，剩番兩隊會陪韋斯咸降落英冠，根據英國《太陽報》估計，英超降班隊將損失8000萬鎊（約10億港元）收入，所以各隊不但為榮辱而戰，亦要為荷包而戰！




新鮮出爐嘅英超冠軍曼聯，今晚主場迎戰尾三護級球隊黑池，今場波令人聯想起○七年，當時已奪得聯賽冠軍嘅曼聯，喺英足盃決賽前嘅主場煞科戰以○比一不敵韋斯咸放生對手，今仗情況相似，曼聯事先張揚會收起主力，黑池有權爆冷，捧「讓球客勝」及大盤。 （有線301及201台周日晚11時直播）


曼聯煞科戰放水有前科


今場波未踢已爆發口水戰，曼聯下周出戰歐聯決賽，大條道理畀主力休息，其他護級球隊當然不滿，要求英超賽會插手，若曼聯唔出強陣嘅話就作出懲罰，黑池領隊荷路維亦唔執輸，話畀賽會及其他對手針對同迫害，不過費格遜就一於好少理，以球隊利益為大前提，講明會畀一班近期較少上陣嘅球員落場。




當然，曼聯一班後備亦唔講得笑，好似近期坐冷板櫈嘅貝碧托夫，今場就要爭取入球，為英超神射手而戰，另外其他新人如基斯史摩寧、達施華兄弟都唔敢偷懶，希望盡最後努力，可以喺歐聯決賽獲派上陣，但講到戰意始終係黑池高啲，強如巴塞隆拿上仗喺奪冠後對拉科魯尼亞都和波收場，故曼聯今場失分一啲都唔奇！




黑池季初表現唔錯，但踏入季中頻頻失分，幸好最近再度回勇，近四仗保持不敗，上仗主場更擊敗保頓四比三，對球隊士氣有好大幫助。主將查理阿當狀態大勇，近十四次上陣包辦十二個助攻或入球，另外射手杜迪利甘保亦相當弗，今季已取得十三個入球，既然兩個主力都咁勇，今場一於博黑池搶分成功，捧「讓球客勝」。