韋根死過翻生 大起史篤城

猪拉多纳

22/05/2011
文： 蘇豪

英超尾二球隊韋根煞科戰作客史篤城，韋根上場反勝韋斯咸重燃護級希望，主將尼索比亞近三戰入四球弗到漏油，球隊形勢危急，勢必全力搶攻。不過，史篤城主場惡到暈，近八次聯賽主場不敗，而且場場有士哥，韋根難保清白之身，投X首選大盤。 （有線63台周日晚11時直播）




韋根上周主場對韋斯咸半場落後兩球，換邊後連入三球反勝，進攻主力尼索比亞個人梅開二度成英雄，此子近三戰入四球，據報成為新特蘭及祖雲達斯等球會目標，肯定繼續搏命爭取表現。韋根現與尾三黑池及尾四伯明翰同得三十九分，但得失球較差，若想護級一定要爭氣，戰意唔使懷疑。




史篤城主場火力強




史篤城早前於英格蘭足總盃決賽不敵曼城，之後兩軍再於聯賽碰頭，史篤城派出大量副選大敗收場，似乎有心留番煞科戰先搏殺。事實上，史篤城踏入二○一一年於主場惡氣十足，聯賽八戰六勝兩和，單計近四戰轟入十一球，包括以三比一擊敗阿仙奴，火力相當強勁，有條件同韋根鬥攻。




兩軍首循環於韋根主場踢成二比二，去季史篤城主場出擊亦開出相同波膽。韋根為求護級，料會擺大個頭以尼索比亞、洛達列加及湯卡華利組成進攻三叉戟，有力撕破對手防線，大盤值得一試。