狼隊打強心針砌布力般

猪拉多纳

22/05/2011
文： Wendy

今晚多場英超關鍵戰揀邊場睇？球彩台直播狼隊主場對布力般流浪，呢場邊隊贏就肯定護級成功，如果打和有可能攬住一齊降班，咁計法梗係呢場最刺激啦，我就睇好狼隊會好狼死咁踢布力般落去英冠！




（有線64台周日晚11時直播）




相信大部分球迷都對主隊較有好感，皆因狼隊今季都踢咗好多場好波畀大家睇，佢哋老闆賽前向領隊麥卡菲大打強心針，話就算不幸降班都唔會炒佢，真有人情味！佢哋近三場聯賽搶咗七分，狀態唔錯，上場作客三比一贏新特蘭，中場馬菲查維斯一入替即刻有料到，佢最勁係兩邊出波，入場幾分鐘即有球靚波畀到首席神射手史提芬費查頂入，希望麥卡菲可以畀佢踢正選啦！




左中場有史堤夫亨特，呢位愛爾蘭國腳又係好爆得，有條咁攻得嘅中場線，史提芬費查今晚實有波入。同埋大家都知狼隊攻起嚟好睇，但防守就如豆腐，所以必定會以攻代守出盡力搶分，雖然前鋒奇雲杜里有傷未能上陣，但其餘人腳夠撐。


布軍作客失球冠英超


布力般當然都會同狼隊嚟個最後痛擊，因為和波大家都冇着數，首循環布力般主場贏三比○，但作客信唔過，十八場聯賽作客失四十一球，係英超作客失波最多球隊。若果布仔呢場心急搶攻，後防就更易畀狼隊搵到機會！




布力般上場打和曼聯，皆因對手未盡全力，表現根本唔合格，呢場對狼隊就冇咁好彩。布力般今季都令大家睇咗好多場悶波，又令大家輸咗唔少錢，一於落去下面英冠玩啦！