大戶狂掃紅魔下盤

港陌

28/05/2011
文： 肥叔

歐聯決賽備受矚目，曼聯同巴塞隆拿合演夢幻決賽，各地莊家嚴陣以待，迎接本年度最後一場超級大戰，亦係賽季最後一個高潮，生意唔使講一定好！睇番初盤情況，現時投X額頗為理想，主要因為好多散客買埋一份，千祈咪睇小呢啲散飛，積少成多條數都幾襟計。


散客熱捧巴塞


環顧各大莊家盤口，大部分開出巴塞讓平半至半球，巴塞個「地上最強」金漆招牌非常吸引，所以唔少散客都買巴塞讓平半上盤，名副其實係名牌效應。至於大戶諗法完全相反，佢哋普遍睇好曼聯，揀啱水位係咁掃曼聯受讓半球下盤，擺明同啲散客打對台。




以波論波，巴塞確係高啲，不過大家好容易會忽略一點，今場決賽喺溫布萊球場舉行，曼聯有如喺主場出戰，優勢相當明顯，而且班球員愈踢愈成熟，絕對有得撼。單從盤口分析，紅魔鬼有半個主場之利仲有得受讓，梗係抵玩啲啦！