比利時破土而出

魑魅魍魉

03/06/2011
文： 蘇斯黑柴

歐國盃外圍賽Ａ組上演出線關鍵戰，排名次席嘅比利時主場迎戰第三位土耳其，比利時領先土耳其一分但多踢一場，要爭出線形勢上非勝不可。呢支八十年代盛極一時嘅「歐洲紅魔」，過去十年飽受青黃不接之苦，近年加強青訓下終見成果，一批小將進步神速，於歐洲球壇刮起「青春風暴」，今晚面對陣容不整嘅土耳其小讓平半，黑柴捧比利時上盤。（有線61及64台周六凌晨２時45分直播）


黃金新一代收成


比利時近十多年來國際賽成績平平，不過該國足總致力推動嘅青訓已屆收成期，國內湧現大批潛力優厚年輕球員，呢批小將喺歐洲已逐步揚名，深受歐洲各大球會青睞之餘更被譽為「黃金新一代」，有望喺未來幾年協助比利時在大賽中取得突破成績。當中強力射手盧卡古已成歐洲最矚目小天王，呢位有「新杜奧巴」稱號嘅射手上月才剛滿十八歲，目前正同英超三強車路士、曼城及熱刺斟介，相信今夏必然登陸英超，可惜此子賽前操練中受傷，今仗未能上陣。不過盧卡古喺國家隊表現未算突出，至今只取得兩個入球，佢嘅缺陣對球隊影響唔算好大。




比利時過往畀人印象係攻強守弱，不過自去年由利根斯執教後進步明顯，近六場國際賽四勝二和未輸過，包括熱身賽作客二比○輕取俄羅斯，就算分組賽首循環作客土耳其輸二比三，踢落形勢亦唔輸蝕，若非後防大將高柏尼被逐，鹿死誰手都未知，今次主場有力復仇。


土耳其中場不整


土耳其情況相反，近期演出每況愈下，近五場國際賽只喺主場贏過積弱嘅奧地利，國內傳媒批評領隊希丁克嘅保守踢法唔適合球隊，令佢相當冇癮，加上今仗陣容不整，兩名中場大將紐尼沙軒同咸美艾天托普雙雙缺陣，加上攻守都出色嘅費倫巴治右閘干奴爾喺聯賽中受傷，對球隊打擊甚大，作客遇上進步中嘅比利時睇低一線。


夏薩特


年齡：20歲 位置：中場




効力球會：里爾　　

真正中場指揮官，盤球技巧及射術都令球迷瘋狂，係里爾贏得法甲冠軍功臣，並當選法甲最佳球員，連施丹都話佢係自己接班人，阿仙奴及拜仁爭相收購。

維頓漢

年齡：24歲 位置：後衞

効力球會：阿積士

視野廣闊氣力充沛、兼擅長遠距離射門，係阿積士今季重奪荷甲冠軍主要功臣，已被阿仙奴領隊雲格睇中。

韋迪素

年齡：22歲 位置：中場

効力球會：標準列治

於比利時國內評價極高，被認為擁有成為全能中場嘅一切條件，場上視野廣闊擅於派牌，助攻助守體力驚人。

米洛列特

年齡：22歲 位置：門將

効力球會：新特蘭

年紀輕輕已於英超冒起，身形高大技術全面，喺剛結束嘅球季已經站穩新特蘭正選，前途無限。