法國白俄D組細王決

魑魅魍魉

03/06/2011
文： Mic少

歐國盃外圍賽D組白俄羅斯主場對法國，牌面上法國高兩班，但實際踢落並非如此，白俄防守穩健，更曾於首循環作客擊敗法國，今仗並非冇得打。法國於榜首有四分領先優勢，亦毋須盡數對手，而且雙方於今次外圍賽同樣五戰全細，一於再追入球細。




（now 714周六凌晨２時50分直播）




法國球壇近期陷入種族歧視風波，有傳足總想限制青訓系統中黑人及阿拉伯人數目，據聞領隊白蘭斯亦支持呢項建議，事件曝光後令佢備受下台壓力。種族問題一向非常敏感，法國屬多種族球隊，隨時影響團結性削弱戰意。


兩軍各５戰全細


事實上，法國由白蘭斯執教後，進攻唔及以往銳利，今次外圍賽五戰全開細，包括主場○比一輸畀白俄羅斯，至於四場勝仗都係小勝兩球，包括兩戰魚腩盧森堡都係贏二比○，可見佢哋只求三分不求大炒。雖然賓施馬、列貝利、馬隆達及拿斯尼等主力都有入選，但佢哋剛應付完一季激烈聯賽，心態上或會開始鬆懈，準備放大假下，未必可以發揮十足水準。




白俄球員多數喺俄超搵食，質素唔曳，佢哋最大殺着係防守，外圍賽五戰只失一球，但亦只有三球進帳，同樣五戰都開細，屬於典型守強攻弱球隊，加上今仗對手係強敵法國，白俄更加會先做好防守，即使攞一分亦達標，估計今場入波偏少。