|
|
開鑼日10場田草賽事，謹祝《成報》讀者場場勝利，首日發大財。而根據近季同日賽果，大熱門成績唔錯，譬如上季10場之中，有9匹大熱門上名，唔通今日又會咁「熱」情。
第7場 第二班（100-80分） 1400米
「醒目精英」正如暑期所講，復出後承接到上季尾勢頭，預期今季能力可進一步增值，雖然初上二班，負磅輕減低阻力，或可完成跨季三捷。
「家樂飛」分數有壓力，好在落番二班，同埋只負中磅，喺主項路程仍有得爭。「喜惑」太準，亦係較易操起一類馬，一日未斷纜，依然要重視。
「滿地金」上季已指出毛病喺邊，嘗試用配件係好事，係擔心外檔會略蝕腳程。「戶外名駒」跑新鮮好叻，希望休出路短也可追得切。「金堡龍華」大閘試得好差。「福智」外地及在港一出都贏，或許係特利休出，大冷可拖一注。
第1場 第五班（40-15分）1200米
「上浦駿將」程序上與去季一出即勝賽前差唔多，而最近草閘試得唔錯，去到最後試跑，輕鬆完成而收身滿意，已具水準，對準勝途，有晒意圖。「厲行星」早前楔內欄贏泥閘姿態好，只要臨場及閘內唔係發太大脾氣，以佢嗰段後勁，末段隨時湧到上嚟。
「龍船快」1400米會比此程好，不過，初出唔計較得咁多，總之係有班利。「快意」工夫壓迫性唔細，似有搏頭圍意思。「開心好多」唔係14檔，同埋田草往績太差，其實落班好惡。
第2場 第五班（40-15分） 1400米
「雄心馬主」及「愛拚者勝」，五班有分量，1400米更是最有根據，只係擔心前駒轉倉首仗跑得番幾多，及後駒外檔有幾大影響而已。
「歡樂寶寶」最近大閘整體表現唔算好，又慢閘又要迫住至肯追，但總認為佢有幾多分喺手，只要唔係全無狀態，路短亦唔敢批唔死。「福至心靈」連1200米也追得近，五班大超，跑回此程，適合得多。「放縱」要冇馬鬥搶先有運行。
第3場 第一班（120-95分） 1200米
「萬事佳」如因廐侶「讚賞」未夠態關係，早段唔夠佢快，畀佢慢慢帶，形勢又似上季贏此程時，就算對手有幾強後勁，亦唔易反先。
「小橋流水」及「富貴金龍」表現會有幾好，視乎前駒早段放成點，計級數當然夠有凸。「時尚風采」大閘追得勁，希望再隔多個暑假，真係養得番，今場只負122磅，好有危險性。
第4場 第四班（60-40分） 1600米
「進攻足球」唔叻，但此程算係正宗，其實130磅已嫌重，略欠冠軍相，卻唔難有P。「錢程萬里」及「正榮」，跑法主動，除非「幻想家」搗亂，如果唔係，佢會食正形勢。
「奪錶」係睇郭立基舞唔舞得掂。「善風」及「好運得福」，前駒4季初出冇P，擔心！後駒要靠後追，今場未必好跑。「得力助手」備戰比上季暑後完整得多，論評分亦回落恰可水平，有冷門機會。
第5場 第四班（60-40分） 1200米
「大家勝利」、「好食德」及「駿方」，俱受重磅問題困擾，唔係冇實力，但會削弱勝望。「藍城堡馬」及「蜚聲國際」，比較兩駒大閘表現，前駒混在馬群嘅走勢吸引得多。「樂融融」泥閘出得快，末段勒住仍湧得好，縱級數非高，但唔係冇資格贏。「風火飛駒」跑法唔易克服外檔。
第6場第四班（60-40分） 1400米
「金鑛龍華」暑後進一步變乖，如轉化成能力，比賽時更易操控，四班超得仲緊要。「氣定神閒」及「搖滾雄豐」，目前分數唔會有好大壓力，只不過，兩駒俱要靠賽事形勢。
「幸運來」冇馬走，11檔隨時殺到埋欄，可能掌控到形勢。「成功年代」差1分落班，心態唔知，論近況唔係冇水準。「雪米糍」埋門專登省多課，睇整套程序，初出唔似淨係求熱身。
第8場第二班（100-80分） 1000米
「鷹之團」試到去埋門草地，已經唔使再迫，進度早早紮起。今場上二班負磅減輕，反而仲好跑。「順利得勝」跑姿比上季好咗，如果落場跑一樣係咁，或犀利好多。
「活力至寶」大閘冇嘢睇，一直喺尾，但之後草地觀感幾好，1檔早段點處理則係關鍵。「多益善」108磅，又唔係賽前懶懶閒，唔可以睇小。
「活力飛駒」直路賽比1200米好跑，卡士在此場亦數一數二。
第9場第三班（80-60分） 1200米
「皇帝法令」及「熊英雄」，一時瑜亮，邊匹最終會贏到，未必係負磅差距問題，反而繫於形勢及發揮方面，總之，呢對馬級數贏晒。
「堅旺財」上季尾跟開，早已指出此程比谷草為佳。「跑得叻」與「友瑩果」，1隻輸實力，1隻外檔或多耗力，要睇早段點處理和際遇。「海王子」明知1200米短，但已經係揀無可揀嘅配腳。
第10場第三班（80-60分） 1400米
「中環英雄」能夠贏到二班頭馬「如願以償」，唔會唔值90分或以上，現評72分，有排未到頂。而近試觀感夠精神又有力，卻唔覺急躁，進度理想，一出應該會跑得好。「紅山茶」要博係1400米及升班問題，中線就梗係唔擔心上唔到二班！
「快利多」或會受惠今場略偏快步速。「香檳歲月」與「自由萬歲」，靠輕磅打拼，但要贏則要過好幾關。「永勝多」及「金鑽龍華」，常常初出跑得好，邊線配腳。
|
|
金睛卡
发表于 2011-9-11 05:22
变色卡
显身卡