櫻花「集客大作戰」圍攻全北

猪拉多纳

14/09/2011
文： 走肖

亞冠盃8強首回合大戰爆發，重頭戲大阪櫻花主場對全北汽車，櫻花為咗打呢場仗，特別進行「集客大作戰」，又做商場騷又出精品引球迷入場，新王牌清武弘嗣（下圖）更話明要砌低全北，達成進軍世冠盃目標，戰意無敵，2.08倍主W博得過。（now671台周三晚6:30直播）


全北汽車近4戰狂失波


由於踢夜波影響上班族同學生球迷入場意欲，櫻花最近拉隊去商場宣傳亞冠盃，又同贊助商合作促銷波飛，同埋出特別版精品氹球迷入場，目標係有15,000個擁躉打氣。大家知啦，櫻花呢隊波潛力無限，最近賣走乾貴士，但播戶龍二同金甫炅又突然着晒火狂入波，首回合主場贏波唔出奇喎。




雖然櫻花隊長茂庭照幸日前受傷，中場路爾斯馬天尼斯又未好番，但32歲嘅播戶龍二近4場兩度連中三元，最近入選國家隊嘅清武弘嗣仲話好有信心主場贏波，對手全北近4場3次失2球，射手李東國上場又射失12碼，可能會影響比賽信心，或者係行衰運嘅開始。


亞冠盃賽制：


8強為主客兩回合制，今仗為首回合，若兩回合總比數打和，先計算作客入球優惠，再和的話，則在次回合90分鐘後進行加時，並要踢足30分鐘，再和則互射12碼分勝負。