浦和發奮捉松鼠氹老細

猪拉多纳

14/09/2011
文： 九叔

浦和紅鑽、大宮松鼠兩隊衰波，今日响日聯盃第二圈首回合交手，賽前主隊浦和高層出現變動，總經理柱谷幸一被炒魷，响呢啲風頭火勢，佢哋班人實打醒精神，1.8倍主W不妨一博。（開賽時間：周三晚6:30）




浦和呢排真係亂晒坑，除咗前鋒田中達也右邊大髀傷咗，尋日證實要抖幾個禮拜，大前晚仲唔聲唔聲，突然「電擊」解僱總經理柱谷幸一，改由總務部長山道守彥升任強化部長，兼任總經理職務，據聞社長橋本光夫向高層辣手開刀，原因係對隊波排聯賽14位非常不滿喎。




老細發火，非同小可，浦和班球員自然希望踢番好啲，氹番掂橋本社長。依家爭日職冠軍就冇可能o架嘞，日聯盃呢舊雞肋不嬲冇乜球隊認真對待，反而就係浦和攞番個彩嘅最佳場合嘞。




當然由往績去睇，經歷高層大地震嘅浦和，過去7次响埼玉個場鬥松鼠，只係得2勝1和4負，仲衰過作客，真係冇本錢敢話贏人。但係松鼠家陣响日職排尾四，形勢惡劣，有氣都留番聯賽至搏，又點會响呢啲無關痛癢嘅波死嚟吖。唔使諗，今場波衰鬥衰，梗係買主隊，要浦和主W啦！