卡卡復出 撐皇馬2.02倍「讓客」

猪拉多纳

22/10/2011
文： 查理阿蛋

西甲今晚上演一場「富豪對決」，由「西甲曼城」馬拉加迎戰皇家馬德里！不過錢用得多唔代表有好成績，馬拉加同皇馬始終實力有差距，後者連續3場都至少入4粒，加上有卡卡復出，小妹梗撐「銀河艦隊」2.02倍「讓客」！（now632及660台周日凌晨2:00直播）




連歐聯在內，皇馬近5仗合共攻入21球，僅失3球，攻、守穩健程度都相當驚人！射手希古恩近況好到你唔信，2個星期內3度喺球會同國家隊上演帽子戲法，加埋卡卡復出、C朗唔再獨食轉行做助攻王，「銀河艦隊」近排可以話係遇神殺神、遇佛殺佛，絕對唔需要懷疑佢哋火力。


馬拉加磨合需時


吸取咗上季慘敗畀巴塞嘅教訓，領隊莫連奴一反「寸王」本色，講到明唔會輕敵：「冇幾耐之前我哋先喺聯賽失咗5分，仲有地方需要改善！」又係嘅，如果皇馬今季想壓過巴塞拎冠軍，真係1分都唔可以再失，對住馬拉加就更加唔會放軟手腳啦！




英超曼城燒咗幾季錢，嚟到今季先夠班挑戰車仔同曼聯爭冠軍，前車可鑑，馬拉加亦都冇可能一季就去到皇馬、巴塞嘅級數。雖然新收購嘅辛迪卡索拉、雲尼斯達萊、祖亞昆等都極具級數，但磨合需時，仲要年紀亦有番咁上下，講活力同體能都唔及皇馬，小妹覺得今仗皇馬絕對讓得起馬拉加！